Anda di sini

Anang minta penemu ba media rama dikena mutar penanggul

 Karim dalam aum pengarang berita.
AUM MEDIA: Karim dalam aum pengarang berita.

KUCHING: Raban nembiak dilalau anang bepanggai enggau mantaika penanggul diri, sereta minta penemu nengah media rama dikena mutarka penanggul ti ditapi sida.

Menteri Dagang temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah mega ngelalau mensia mayuh ngambika enda meri penemu ti nuju jalai ke salah dikena ngaga pemutus.

Iya madah, kelimpah ari media rama mayuh agi chara bukai ti lebih engkeman dikena mutarka penanggul tauka ngiga runding orang bukai.

“Ba media rama mayuh pekara ke ulih diengkah tauka ditulis kitai, tang anang ngena media rama endur betanya tauka ngiga penemu baka, betanya sekalika patut idup tauka enda enggau ke bukai.

“Laban nuan enda ngelala sapa ke diluar ti macha utai ke diengkah tauka ditulis ba media rama. Kitai ngarapka mensia mayuh lebuh meda utai baka nya, anang ngachuk tauka nyukung orang nya munuh diri (ambika chunto).

“Aku ngarapka enda ngira sapa ke bisi penanggul besai tauka mit, tusut runding, penanggul ba duit, ruang bilik, penanggul enggau bakih sereta ke bukai, nama ke patut iya nya giga enggau naka ulih chara mutarka penanggul tauka penusut runding nya,” ku iya.

Abdul Karim mansutka pekara nya ngagai raban pengarang berita bekaul enggau nembiak indu ti bebadi nyawa dipelabaka terejun ari begunan pengudah dipadahka nitihka undi media rama nengah Instagram.

Bejaku baru iya madah, entara chara ke ulih dikena mutar tauka ngurangka penanggul iya nya, nuan patut bebakih enggau mayuh orang laban ari nya ulih bekunsi penanggul lalu nengah chara nya dikearapka ulih ngurangka penanggul tauka tusut runding.

Lebuh ke ngenang pasal siku nembiak indu, 16, ti bebadi nyawa nya, Abdul Karim madahka diri sinu ati sereta pechaya nembiak indu nya munuh diri engka tusut runding ketegal penanggul ruang bilik.

Nambahka nya ku iya, pekara nya nyadi mega engka ketegal indu nya ngengkah tauka madahka penanggul  nya dalam internet lalu betanya ngagai siber tauka mensia mayuh nama ke patut digaga.

“Nembiak indu  ti beumur 16 taun ti engka bisi pendiau manah ke jemah ila lalu ulih mai pemaik ngagai pemansang menua.

“Lebuh iya ba maya umur nya ninggalka kitai selama iya, kitai enggau ruang bilik iya ukai semina lenyau tang rugi,” ku iya.

Kelimpah ari nya, iya ti nyadi menteri ke nyara nembiak madahka opis menteri iya ngatur mayuh program nyengkaum ke ulih nempa raban nembiak nyadi lebih manah, program lumba enggau main, program main asal enggau ke bukai ti meri penguntung ngagai bala nembiak.

Ku iya ke tuai ngajar ke biak, lalu ke biak patut ulih mereti bagi ke nuju jalai ke betul.