Anda di sini

Perintah nengeri seruran nyukung produk ‘Warisan Kampung’

Advertisement
 Abang Johari (dua kanan) begulai enggau temuai dipebasa ke bukai ngayanka produk ti ngena chap ‘Old Kuching Kampung Heritage’ ba pengerami bejadika PWK ba palan bebelika barang Mydin, Petra Jaya, kemari.
DEKA NGEMANSANGKA PWK: Abang Johari (dua kanan) begulai enggau temuai dipebasa ke bukai ngayanka produk ti ngena chap ‘Old Kuching Kampung Heritage’ ba pengerami bejadika PWK ba palan bebelika barang Mydin, Petra Jaya, kemari.

KUCHING: Perintah nengeri meri sukung penuh ngagai produk ‘Warisan Kampung’ awakka ulih rembus ba makit menua luar.

Kepala Menteri Sarawak, Datuk Patinggi Abang Johari Tun Openg madah munyi tu lebuh ti bejadika pengerami produk ‘Warisan Kampung’ (PWK) ba Mydin Petra Jaya, Jalai Demak, kemari.

Iya madahka entara produk asil ari peranak menua tu ti chukup dikelala mayuh iya nya ‘Kek Hati Parek’ enggau ‘Achar Limau’ ke bisi peluang ti besai ba dagang menua luar enti dikelaluka enggau manah.

“’Kek Hati Parek’ enggau ‘Achar Limau’ dua iti chunto produk pemakai ari Kampung Melayu ti chukup dikelala. Pemakai tu jarang ditemu lalu semina digaga nitih maya ke patut aja.

“Aku pechaya produk ti dikeluarka tu meseti ngemeranka pemeresi sereta disimpan enggau manah, lalu nya ulih dijual enggau laku ba makit tebuka,” ku iya bejaku maya program nya kemari.

Program tu diatur sama enggau Biro Ekonomi Satok, UNIMAS, SMA, OKSHE, MYDIN Holdings sereta kerejasama perintah nengeri Sarawak. Program tu siti ari medium keterubah dikena nyaup bala pengeluar produk Industri Mit enggau Jelan Pemesai (IKS) nengeri Sarawak diangkat nyengkaum nambahka tikas produktiviti sereta ekonomi dagang kelebih agi ngagai rayat.

Mensia mayuh ba mengeri Kuching sama ngenataika diri enggau nyukung asil PWK ti dibantaika maya nya.

Iya pechaya nengah kerejasama enggau palan bebelika barang Mydin ulih nyaup PWK didagang ngagai Semenanjung Malaysia.

Berebak enggau nya, Abdul Samat Gany madahka program tu muka peluang ngagai pengeluar PWK ba selampur Sarawak dikena bedagangka produk sida tu enggau chap ‘Old Kuching Kampung Heritage’.

Iya madahka ungkup renggat keterubah sepenyampau 12 iti produk dikeluarka sembilan iku pedagang.

“Inisiatif tu udah dipejalaika berengkah ari Jun tu tadi nyengkaum 36 iti PWK enggau 12 iti  produk didagangka baka ‘bumbu pedas’, ‘kacang bersalut’, ‘acar limau’, ‘kuih sepit original’, ‘kuih sepit berinti kacang’, ‘kuih sepit berinti coklat’, ‘kek hati parek’, ‘kek buah’, ‘sambal tumis ikan bilis’, ‘pitis buah’, ‘kuih cincin’ enggau ‘rempah masak hitam’,” ku iya.

Ku Abdul nambah, ungkup renggat ti nangkan ke tu, produk ke bukai mega deka dijual ba palan bebelika barang Mydin, ngambika ulih besemekih enggau produk ke bukai ba makit tebuka.

Sama ngenataika diri iya nya bini Kepala Menteri, Datuk Amar Juma’ani Tuanku Bujang, Sapit Sekretari Perintah Nengeri (Transformasi, Prestasi enggau Penyampaian Perkhidmatan) Datu Dr Sabariah Putit, Naib Canselor UNIMAS Profesor Datuk Dr Mohammad Kadim Suadi, Menijar Projek Mydin Ganesh Chinniah, Mandal Ketuai Orang Indu Parti Pesaka Bumiputera Bersatu (PBB) Datuk Madinah Datuk Abang Openg enggau Sapit Sekeretari Besai PBB, Ibrahim Baki.

Advertisement