KUCHING: ‘Perais’ ungkup bala indai ti ngadaka anak deka dipadahka maya pengawa mantaika Bajet Nengeri 2020 kena ujung taun tu.
Kepala Menteri Datuk Patinggi Abang Johari Tun Openg madahka mayuh empas belanja ti meseti dikira sebedau perintah nengeri nentuka bakani ‘perais’ tu deka diberi ngagai bala indai.
“Ukai diatu. Tang aku deka madah jemah ila. Kebendar iya mayuh implikasyen belanja nyengkaum pekara tu.
“Aku deka madahka ‘perais’ tu maya mantaika Belanjawan Nengeri 2020, pengujung taun tu,” ku iya.
Iya madahka lebuh ditemu pengarang berita sepengudah bejadika Pengerami Ngelanchar ‘Produk Warisan Kampung’ ba Pasaraya Mydin, Petra Jaya , ditu, kemari.
Kena 4 Mei nyin tadi lebuh ngulu Pengerami Ngelanchar aplikasyen Sarawak Pay ba KK Super Mart, Kota Sentosa, Abang Johari madahka perintah nengeri deka meri ‘perais’ ngagai bala indai ti ngadaka ka anak sida kena meri pengandal ngagai sida.
Iya nyemetak madahka sepengudah bala indai ngadaka anak, sida patut suah dijaga kelebih agi meri anak nusu ari tubuh indai sepengelama enam bulan.
Nambahka nya mega, perais nya mega nyengkaum perengka ungkup nembiak mit ke baru ada.
Sebedau tu, perintah Sarawak deka madahka Endowment Fund Sarawak (EFS) sepenyampau RM1,000 ungkup bala nembiak mit ba Sarawak ti ada taun tu.
Belanja ke sekali tu, diberi ngagai semua bala nembiak mit ke baru ada enda ngira bansa enggau pengarap.