KUCHING: Penanggul jalai sekut ti kelalu balat kelebih agi ba Kota Samarahan deka diputarka enggau pemisi perengkaguna Transit Aliran Ringan (LRT).
Nerima perambu tu enggau manah ari Perintah Sarawak deka terus bejalaika projek LRT ari Kota Samarahan ngagai Kuching, Chairman Opis Kaunsil Mengeri Kota Samarahan (MPKS), Dato Peter Minos (gambar) madahka projek tu endang dianti bala mensia mayuh kelebih agi sida ke diau ba Kota Samarahan.
“Tu projek LRT keterubah ba Sarawak, lalu kitai chukup temegah ati kelebih agi nya ungkup mensia mayuh ti diau ba Kota Samarahan enggau Kuching.
“Kelimpah ari nya, kitai mega beterima kasih ngagai Kepala Menteri Datuk Patinggi Abang Johari Tun Openg ti nemu sereta siru enggau penanggul penyekut jalai ba endur tu,” ku iya.
Minos nambahka, Samarahan ngembuan populasyen mensia mayuh ti besai iya nya urung 200,000 iku kelimpah ari nyadi palan ungkup Universiti Malaysia Sarawak (UNIMAS), Universiti Teknologi Mara (UiTM), Pusat Jantung, Institut Pengajar, Institut Pengelandik enggau kem soldadu.
Lebih 40,000 rumah endur diau ba Kota Samarahan enggau ke bukai sereta benung digaga majak nambah enggau jampat ba Sarawak iya nya 6 peratus setaun.
“Kitai ba Samarahan endang patut begunaka LRT laban penyampau tubuh komuniti ti mayuh lalu kitai enda ibuh semina bepanggai ngagai pengangkut darat, tajapan lampu trafik enggau jalai bukai deka digaga.
“Nyadi chairman MPKS, aku meri besai terima kasih ngagai Kepala Menteri ti udah nyadika Kota Samarahan tu sebuah kandang menua ti pemadu andal nerima berita tu,” ku iya.
Ditambah enggau jematan baru Samarahan ti udah beroperasyen, MPKS ngadang mayuh agi pemansang deka dibai tama ngagai Sadong Jaya, Asajaya nyengkaum Sebuyau enggau Simunjan.
Lebuh bejadika jematan tu, udah tentu nambahka perengka pengangkut jalai baka kerita, mansa jalai Kota Samarahan enggau mega ba Serian, Beratok, Tapah sereta Siburan.
“Enti projek LRT tu enda dipejalaika, kandang menua Kota Samarahan tentu sekut enggau kerita sereta pengangkut jalai ke bukai.
“Nya alai, kami ba MPKS enggau Samarahan berasai andal ati enggau projek ti deka dipenyadika ila,” ku iya.