KUCHING: Penyampau temuai ari menua luar diau ba nengeri Sarawak majak nambah bepelasarka statistik berengkah ari taun 2006 nyentuk 2018 taun nyin kemari.
Program ‘Malaysia Rumah Kedua Saya’ (MM2H) iya nya kimpin diatur Opis Menteri Dagang Temuai Malaysia ungkup temuai luar ti ulih diau ba menua Malaysia enggau lama ngena pas nemuai sosial.
Menteri Kaunsil Kandang Menua enggau Pengawa Berumah, Datuk Dr Sim Kui Hian madahka, penyampau bala temuai luar ti paling mayuh nyadi penyereta ba MM2H iya nya ari menua Great Britain bisi 212 iku, China (169 iku), Taiwan (148 iku) enggau ke bukai.
“Aku enggau bala Opis Menteri Dagang Temuai, Seni, Main Asal, Nembiak, Lumba enggau Main Sarawak berekereja sama berunding sereta merambu chara MM2H dipejalaika lalu enti nyema temuai ari menua luar nadai ngerejista ba program tu sida enda ulih lama diau ba Sarawak.
Program tu tebuka ngagai semua temuai ari selampur menua ti dituku ari menua Malaysia (semina menua Israel, Montenegro enggau Yugoslavia) enda ngira bansa, pengarap, indu tauka lelaki sereta umur. Sida ti ngaga peminta ulih mai laki tauka bini enggau anak sida ke bedau nikah baruh umur 21 taun nyadi ka orang ari baruh jaga sida.
“Program tu nyengkaum kerejasama 18 ejensi ari Opis Imigresyen Malaysia Sarawak, Opis Tanah enggau Survei Sarawak, Opis Kastam DiRaja Malaysia, Kaunsil Luyar Nengeri enggau ke bukai.
“Ba Sarawak, program tu dipeda agi kurang nerima sambut iya nya semina lebih 100 iku bala temuai ngerejista diri ngambi bagi dalam program tu ninting tahun.
“Tajapan MM2H diatur ba selampur menua Malaysia, bisi bida kelebih agi ba dalam kriteria peminta, garis entara menua enggau insentif ungkup program Sarawak enti dibanding enggau nengeri bukai ba menua tu,” ku iya.
Nitihka atur bagi menua tu, peminta meseti berumur 50 taun ke atas lalu laki tauka bini sida nadai takat umur ulih tama ngagai menua tu, tauka peminta ke berumur 30 taun ke atas ulih mega minta enti sida bisi anak baruh ari umur 18 taun ke bisi nyambung belajar ba Sarawak.