SIBU: Penyampau 195 iku nembiak sekula deka nerima insentif maya Pengerami Makai Lemai Pra Gawai Dayak 2019 Renggat Pelilih Sibu ti deka diaturka 19 Mei tu ba Ringkat 6, Hotel Kingwood ditu pukul 6.30 lemai.
Chairman pengatur program nya Angelyn Uchi Masing madahka, nembiak sekula tu iya nya sida ke bulih pemutus peresa ti nyulut ba peresa UPSR, PT3, STPM enggau STPM ba taun nyin kemari.
“Kelimpah ari nya, kitai ulih meda pekit Kumang Gawai ka pemadu dianti bala temuai,195 iku nembiak sekula mega deka niki ke pentas bagi nerima insentif sida ba pengawa tu,” ku iya bejaku lebuh ti nyadi chairman ba aum komiti pengatur pekit tu ba sebuah hotel ditu malam kilah ensana.
Sama bisi datai iya nya Chairman Gerempung Bansa Dayak Sarawak (SDNU) bagi menua Sibu ke nyadi penyanding penemu komiti pengatur pengawa Chambai Lindong.
Uchi madahka, pengerami ke skali tu dipejalaika sida Sarakup Indu Dayak Sarawak(SIDS) Sibu enggau kerejasama SDNU Sibu, SDNU Rejang, SDNU Sibu Jaya sereta Serakup Bansa Orang Ulu (OUNA) Sibu.
Kelimpah ari dua pekit tu, ku iya madah aktiviti bukai ti deka diatur iya nya pekit pua kumbu, mantaika main asal enggau pemerindang atas panggau.
Bejaku sentang tikit mija, ku iya, semua tikit ti dijual komiti nya diatu udah abis dijual.
“Bisi 130 iti mija disediaka kami ungkup pengerami tu lalu semua nya udah abis dijual.
“Aku meri besai terima kasih ba sukung mensia mayuh ba pengerami ninting taun kitai tu. Sukung kita tu mih ti deka nentuka pengerami tu bejalai enggau manah,” ku iya nambah.
Sapit Kepala Menteri Datuk Amar Doughlas uggah Embas disadang deka nyadi Tuai Pengabang tauka temuai dipebasa maya pengerami tu ila.