KUCHING: Raban Nembiak Gabungan Parti Sarawak bepenemu Pakatan Harapan (PH) dalam timpuh setaun nyadi perintah nadai pengelurus ati deka ngamatka manifesto tauka semya ti udah disemaya.
Raban Nembiak Gabungan Parti Sarawak (PBB, PRS, SUPP enggau PDP) selubang penemu, madahka PH ti disukung sereta setaun udah nyadi perintah besai baru nadai berita manah ungkup Sarawak ari Putrajaya.
Ketuai Nembiak Parti Pesaka Bumiputera Bersatu (PBB) Gerald Rentap Jabu, madahka perintah PH nadai ngayanka pemendar tauka pengelurus ati deka bejalai tauka ngamatka mayuh pekara ti udah disemaya, manifesto enggau ke bukai.
“Siti pan nadai dikereja (manifesto tauka semaya). Nya alai kitai ke nyadi peranak Sarawak enggau raban nembiak Sarawak deka nanya kini kuing kitai jemah ila nengah perintah tu (PH)?.
“Sida (PH) ngaga kitai tu baka rayat Malaysia kelas kedua.
“Kitai deka ke sida (PH) ngamatka nama ti udah disemaya. Ngenang pasal pengelurus ati tauka pemendar, lurus ati mih ngagai peranak Sarawak, anang bula ke semaya,” ku iya dalam aum pengarang berita lebuh ti ngenang genap setaun PH megai perintah besai.
Nambahka nya, Raban Nembiak GPS nukik pengelurus enggau komitmen perintah PH ngamatka pekara ti udah disemaya maya Pengawa Bepilih Besai ke-14 (PRU14).
Raban Nembiak tu bepenemu,nadai belanja nyadika kebuah mayuh projek enda dipejalaika perintah besai, nya ukai tegal ti patut sereta enda ulih diterima Sarawak.
Ketuai Raban Nembiak Parti Rakyat Sarawak (PRS) Datuk Snowdan Lawan, madahka perintah PH mayuh ngaga polisi ‘u-turn’ sereta nadai meri penguntung ngagai nengeri tu kelebih agi bekaul enggau Pekara 1(2) Konstitusyen Perintah Besai.
“Ba perati kitai sida enda lurus ati deka mantu kitai Sarawak.
“Kitai meda mayuh projek kitai udah dikinsil sida, sida madahka ekonomi Malaysai enda manah tang dalam timpuh ti sama sida ngemendarka mayuh projek di Sabah, Kedah tang nadai di Sarawak,” ku iya seraya madahka projek ke udah dikemendarka perintah BN mega dikinsil.
Nambahka nya, Ketuai Raban Nembiak Parti Rakyat Sa’Ati Rakyat Sarawak (SUPP), Michael Tiang sepenemu enggau Rentap madahka PH ngaga peranak Sarawak baka rayat Malaysia kelas kedua.
Iya madah nengah perintah besai sebedau tu, kitai sama deka dikemansang sebaka enggau Semenanjung Malaysia tang diatu ari baruh PH kitai nadai nerima utai ti sama baka Sabah.
“Diatu penuduk Sarawak dalam Malaysia majak baruh, baka ti dipadahka YB Rentap kitai digaga baka rayat Malaysia kelas kedua,” ku iya.
Kelimpah ari nya, Ketuai Raban Nembiak Parti Demokratik Progresif (PDP) Robert Ayu mega betanya kini ke penunga semaya PRU ba pekara ‘7 guarantees within 1 yeras’ ti nyengkaum 20 peratus royalti minyak enggau ke bukai.