ABANG JOHARI
KUCHING: Perintah Sarawak nengah Opis Menteri Pelajar, Sains enggau Pemansik Teknologi (MESTR) benung ngiga formula bakani deka mantu mutarka isu sekula repuk ba nengeri tu.
Kepala Menteri, Datuk Patinggi Abang Johari Tun Openg madahka, MESTR deka nempa kerejasama enggau Opis Menteri Pelajar Malaysia (KPM) nengah Opis Pelajar Nengeri Sarawak (JPNS) ba pengawa mutarka sekula repuk sereta kuaters pengajar ke udah jai ba sekula di nengeri tu.
Abang Johari madahka diri sinu meda gaya sekeda sekula sereta kuarters pengajar enda tentu lantang tauka meruan endur diau.
"Pengudah meda ke diri empu, aku bisi juluk ati ngiga bakani ulih mantu ngemanahka rumah sekula nyengkaum kuarters pengajar. Ari tu aku terunding deka nyali tauka ngagihka belanja RM1 bilion ari perintah nengeri.
"Kitai benung ngiga formula sereta bekaul enggau duit jali keterubah ari Perintah Sarawak deka ngeluarka RM300 juta enggau kedua RM300 juta sereta RM400 juta, RM1 bilion dalam timpuh dua taun.
"Kebendar cek udah disediaka aku, semina nganti formula entara perintah besai enggau nengeri bakani bejalaika pemansang sekula repuk tu," ku iya.
Abang Johari mansutka pekara nya lebuh bejadika pengerami Hari Pengajar Renggat Nengeri Sarawak Ke-48 ti ngena rambai jaku 'Guru, Obor Hemah Menyinari Pertiwi' ti diatur ba Dewan Suarah Sri Aman, sehari tu.
Bejaku baru iya madahka pengawa ngemanahka sekula sereta kuarters pengajar repuk nya dipejalaika JPNS, Perintah Sarawak semina ngeluarka belanja.
Iya madahka diri beratka gaya rumah sekula, bilik pengajar sereta kuarters pengajar patut manah sereta lantang awakka ulih ngasilka kualiti pelajar dikena nuju nengeri maju 2030.
Sama bisi datai ba pengerami nya, Menteri Pelajar, Sains enggau Pemansik Teknogi Dato Sri Michael Manyin Jawong, Menteri Muda Pengelantang Pendiau Raban Bansa Datuk Francis Harden Hollis, Direktor JPNS Dr Azhar Ahmad sereta bala pemesai ke bukai.