KUCHING: Pemutus nambahka penyampau nembiak ke masuk program matrikulasyen Opis Menteri Pelajar Malaysia (KPM) dikearapka meri pengaga ati ngagai semua rayat.
Menteri Pelajar, Dr Maszlee Malik madahka nya sebengkah ari chara perintah deka mekuh sereta beratka pekara pelajar di menua tu.
Iya mega ngarapka nengah pemutus nya deka ulih nambahka penyampau nembiak ngambi bidang Sains.
“Kitai ngarapka pengudah pekara tu dipadah,ukai semina India tang semua bansa baka Melayu, China,peranak Sabah, peranak Sarawak enggau orang asli gaga ati laban kitai deka beratka pelajar.
“Lebuh kitai nyebut pasal matrikulasyen,ngarapka mayuh agi nembiak kitai belajarka Sains laban matrikulasyen ungkup aliran Sains.
“Nya alai kitai deka nempa mayuh nembiak ngambi subjek Sains, nya kebuah kitai nambahka penyampau nembiak ngambi matrikulasyen,” ku iya lebuh dikerandau raban pengarang berita pengudah nemuai meri basa ngagai Kepala Menteri Datuk Patinggi Abang Johari Tun Openg, ensanus.
Dulu ari nya, di Kuala Lumpur nitihka ripot berita ari Bernama, Maszlee madahka penyampau nembiak ke masuk program matrikulasyen KPM ditambah ngagai 40,000, dibandingka enggau 25,000 sebedau tu.
Ku iya, perintah Pakatan Harapan ngasaika bisi pematut nambahka penyampau nembiak dalam bidang sains enggau kapasiti ti bisi ba program matrikulasyen patut dimaksimumka dikena nyapai tuju nya.
“Pemutus tu mega dipeda nyadi chara ke pemadu manah dalam nentuka program matrikulasyen ulih meri peluang pelajar ngagai sembua bansa,” ku iya.
Nambahka nya, Maszlee madahka aum Bala Menteri mega ngaga pemutus ke alai kuota 90 peratus ungkup nembiak Bumiputera enggau 10 peratus ukai nembiak Bumiputera agi ditanka, senipak enggau juluk asal program nya ti meransang nembiak Bumiputera nampung pelajar dalam bidang sains.