KUCHING: Komiti dagang Bumiputera nengeri tu diperansang begempung sereta bekerejasama awak ke ulih tegap dalam dagang enggau industri.
Kepala Menteri, Datuk Patinggi Abang Johari madah, nengah chara nya komuniti dagang ulih nangkup sereta bejalaika projek besai ke digaga di nengeri tu kelebih agi bekaul enggau infrastruktur di menua pesisir nengeri tu.
Ku iya, Opis Konsultan ti mimit tubuh gawa tauka raban injinir ke mimit enda ulih nangkup projek besai, lalu nya ngujungka projek diberi ngagai orang bukai baka komuniti dagang ukai Bumiputera.
“Nyema Opis Konsultan semina bisi dua iku injinir aja, nguji ngiga mayuh agi injinir, nuan ulih begulai enggau orang bukai nyadi konsortium, ari nya baru ulih bejalaika semua pakej servis konsultan.
“Chara iya ditu, kitai enda tau enda gawa begulai lalu ari nya kitai ulih bejalaika projek,” ku iya seraya madahka nya sebengkah ari chara dikena ngenegapka komuniti dagang Bumiputera di nengeri tu.
Abang Johari mansutka pekara nya lebuh bejadika Aum Besai Ninting Taun Ke-17 Balai Dagang enggau Industri Dayak (DCCI) enggau Randau Dagang ke diatur ba BCCK ditu, lemai kemari.
Bejaku baru, iya meri langgur penemu ngagai DCCI ngambika besaup enggau balai dagang ke bukai, baka meri latih ti betul ngagai komuniti dagang.
“Latih ti betul sereta madahka pasal teknologi baru, dia kitai deka bisi pengatur pengawa ti manah bekaul enggau chara bejalaika dagang.
“Aku ngasaika semua patut ngaduka bagi diri, pia mega perintah bejalaika nama ke patut tang kitai patut begempung bekaul enggau dagang,” ku iya. Kelimpah ari nya, Abang Johari mega ngelalau ngambika anang kelalu ‘besandih’ tang patut ngiga chara dikena ngenegapka dagang. Laban ku iya, enti semina kelalu ‘besandih’ dia pengawa dagang enda ulih mansang.
“Nya kebuah perintah sarawak diatu ngurangka mimit-mimit besandih, kitai bejalai kediri, tu pemutus ke digaga dalam Gabungan Parti Sarawak.
“Kitai enda ulih ngarapka 100 peratus ari perintah besai, Sarawak patut diatur sereta diembing peranak Sarawak empu,” ku iya.
Sama bisi datai ba pengerami nya kemari, Sapit Kepala Menteri Datuk Amar Douglas Uggah Embas enggau Tan Sri Datuk Amar James Jemut Masing, Presiden DCCI Datuk Joseph Salang Gandum, Menteri Muda Industri Pemeranak Puku Malcom Mussen Lamoh ngarika Sapit Kepala Menteri Datuk Amar Awang Tengah Ali Hasan sereta bala menteri enggau pemesai ke bukai.