KAPIT: Penyanding penemu Opis Kepala Menteri, Datuk Alexander Nanta Linggi muji Serakup Tuai Komuniti Dayak Bagi Menua Kapit (KADDCLA) ngembuan tuju sereta nusun aktiviti enggau betul.
“Sebedau tu kita ngatur kediri, siku-siku ngatur tang enda di atur enggau manah. Diatu, kita bisi siti serakup ti betul. Kita bisi tuju ngatur pekara enggau betul. Aku muji KADDCLA manah. Ukai ngereja kediri, KADDCLA mai semua tuai Dayak begerempung begulai ngenataika sada. Lebuh maya kita beserakup, nyamai kita ngereja pengawa lalu nyamai semak enggau pengari rayat ke dipilih enggau ketuai opis, udah tentu kita ulih bekereja enggau manah. KADDCLA bisi tuju, sada ari serakup tang ukai ari siku-siku tang sada penyerakup”, ku Nanta
Iya madah penumbuh KADDCLA nyadi jalai penyerakup entara tuai bansa Dayak enggau nya nyadi siti chara dikena ngemansang bansa enggau komuniti ke bukai.
Iya bejaku lebuh maya bejadi ka aum besai ninting taun KADDCLA lalu aum besai ninting taun nya diatur ba Dewan Suarah Kapit bedau lama.
Iya ngelalau sida ngambi bejalaika serakup nya enggau betul. Serakup nya udah direjista ba baruh pegai perintah.
“Nyadi tuai komuniti, kita patut nemu nama ke nyadi diatu enggau kelebih agi bekaul isu tanah NCR (Native Customary Rights) survei tanah ba baruh Seksyen 6 enggau Seksyen 18. Seksyen 6 perimeter survei enggau Seksyen 18 penama tanah kediri. Padah ngagai bala ti ngaga tuduh ti enda betul lalu madah ngagai sida ke bukai.Selalu kitai ninga sida belaya ketegal sida nadai nemu nama utai kebendar,” tambah Nanta.
Kepala Menteri Datuk Patinggi Abang Johari Tun Openg madah ka URDA (Ejensi Pemansang Tinggi Rajang) deka ngenyampatka pemansang.Sebedau tu semua pemansang diperambu SPU (Statae Planning Unit) ba Kuching.
“Diatu URDA, kami merambu semua pekara ti di kedeka kami. Pengudah URDA ditumbuhka, Kepala Menteri udah ngemendarka agih belanja RM1.5 bilion dikena ngaga mayuh bengkah projek pemansang dikereja sepemanjai taun 2019 nyentuk ngagai 2020.
“Kitai sama bekereja begulai. KADDCLA mega ngambi bagi dalam aktiviti pemansang. Kita patut nemu projek deka dipejalaika. Ari ngembuan runding ti sebaka, dia kitai deka nemu nama ti deka digaga. Kitai betulung enggau diri sama diri dikena ngemansangka Kapit. Lebuh kitai seati, semua utai ulih dikereja,” ku iya.
Sama bisi ngenatai ke jaku maya pengawa nya iya nya Kaban Kunsil Nengeri (ADUN) Pelagus Wilson Nyabong Ijang enggau chairman serakup Pemancha Steward Sawing.
Sekrateri Politik Kepala Menteri Sarawak Nicholas Kudi Jantai, Penulung Residen Pelilih Menua Kapit GalongLuang, Pemesai Pelilih Menua Kapit Elvis Didit, Pemesai Pelilih Bukit Mabong Douglas Pungga, Temenggong Wilfred Billy Panyau entara tiga ratus tuai komuniti ti bisi datai lebuh aum nya.