SIBU: Isu bekaul enggau pekara bebeli barang di Sarawak bisi bebida enggau nama ke nyadi di Semenanjung Malaysia.
Direktor Opis Menteri Pengawa Dagang Dalam Nengeri enggau Pekara Orang Bebeli Barang (KPDNHEP) Sarawak, Datuk Stanley Tan madah, tu diumbaka enggau gaya ekonomi dunya ti enda entap maya hari tu.
“Di Sarawak macham bengkah isu nyadi enti dibanding enggau Semenanjung Malaysia.
“Siti ari kebuah iya nya gaya rampa menua ti pedis dilawa baka di ulu sungai ngujungka rega barang mar ketegal ungkus dikena mai besai.
“Kelimpah ari nya, diatu mega mayuh isu nyadi baka nipu nengah on-line enggau orang bedagang nyual barang enda nitihka pematut,” pia ku iya madah.
Iya mantaika jaku tu maya bejadi ‘Cabaran Interaktif Pengguna’ (CIP) Kelab Penguna Sekula renggat nengeri Sarawak di Kem Belia Kemuyang, kemari.
Stanley mega madah, KPDNHEP chakah bejalaika pelin nambah penemu pekara bebeli barang 2014-2020 dikena ngemujurka opis menteri nya semak agi enggau raban nembiak baka nembiak sekula.
Ku iya, raban sida tiap taun ngelawa ke sekula dikena ngumbuk nembiak nyadi raban Kelab Penguna.
“Kitai deka meda mensia mayuh nyengkaum raban nembiak ngembuan penemu bekaul enggau sosial ekonomi sereta gaya rama.
“Ketegal nya, kami ngarapka penemu bekaul enggau pekara bebeli barang ulih nyikap nembiak napi nama ke nyadi di luar tauka napi isu maya hari tu,” ku iya madah baru.
Ku Stanley, semua orang meseti nemu nama hak diri sereta bela megai tanggungpengawa ngemunaska penyalah nipu orang ba dagang.
Kelimpah ari nya, iya madah, KPDNHEP naka alah numbuhka inisiatif dikena nyaup rayat ngelempungka tating pengidup maya hari tu.
“Ba renggat nasional, KPDNHEP udah numbuhka Kaunsil Napi Tating Belanja Pengidup.
“Tang taja pan baka nya, kitai empu meseti landik ngatur belanja diri ngambika bebelanja nitihka penatai pemisi,” pia ku iya.
Sama bela datai maya tu iya nya Ketuai KPDNHEP Sibu Roslee Maslie.