KUCHING: Perintah besai enggau nengeri nengah kededua Opis Menteri Pelajar bedau bisi jaku putus bekaul enggau chara bayar kontra RM1 bilion dikena mutarka isu sekula repuk di Sarawak.
Menteri Pelajar Malaysia, Dr Maszlee Malik besemaya pekara nya deka nyadi nyata dikena nentuka sekula repuk ba nengeri tu ulih diputarka.
“Pekara ke dikerandau sehari tu (enggau Kepala Menteri Datuk Patinggi Abang Johari Tun Openg) bekaul enggau bayar RM1 bilion dikena ngemanahka sekula repuk di Sarawak. Kami berandau silik pasal tu.
“Kitai deka ke nya nyadi nyata. Tang kitai deka madahka nya lebuh datai ba maya ke patut,” ku iya lebuh dipinta ngenang isu nya.
Dulu ari nya Maszlee enggau raban iya nemuai meri basa ngagai Kepala Menteri Datuk Patinggi Abang Johari Tun Openg ba Wisma Bapa Malaysia ditu, lemai kemari.
Sebedau tu, chara bayar kontra nya dipesetuju entara Kepala Menteri Datuk Patinggi Abang Johari Tun Openg enggau Menteri Pelajar Dr Maszlee Malik ditu, bulan Februari tu tadi.
Ba pun bulan April tu tadi, Putrajaya nengah Opis Menteri Pelajar enda nerima chara bayar kontra RM1 bilion, ti dipesetuju sebedau tu enggau Perintah Sarawak dikena mutarka isu sekula repuk di nengeri tu.
Sama bisi nyempulang iya Ketuai Sekretari Opis Menteri Pelajar Malaysia Datuk Ghazali Abas, Pemesai Wang Perintah Besai Mohd Saiful Sungkih Abdullah sereta Direktor Opis Pelajar Nengeri Sarawak, Dr Azhar Ahmad.
Nambahka nya sama, bisi datai Menteri Pelajar, Sains enggau Pansik Teknologi, Dato Sri Michael Manyin Jawong enggau Sekretari Wang Perintah Nengeri Datu Junaidi Reduan.