SIBU: Langgur deka ngaga Opis Bomba enggau Penyah Penusah (Bomba) Kelas E di Sungai Asap, Belaga udah dirintai ba Pelin Pemansang 2020.
Menteri Pengawa Berumah Enggau Kandang Menua Zuraida Kamaruddin madah, langgur projek deka bekenaka belanja sepenyampau RM500,000.
“Langgur projek tu udah dipasuk ba 2020 Rolling Plan,” pia ku iya madah ngagai pengarang berita, kemari.
Dulu agi ari tu iya ditanya bisi ke enda opis menteri iya merambu deka ngaga Opis Bomba di Skim Gempuru Sungai Asap, Belaga.
Tanya tu bepun ari penusah rumah angus ti nuntung lebih 400 iku peranak Uma Bawang hari Satu, minggu siti tadi.
Ba pekara bekaul Kaban Parlimen Ulu Rajang Datuk Wilson Ugak Kumbong ngansak Opis Menteri Pengawa Berumah enggau Kandang Menua ngemeratka pengawa ngaga Opis Bomba Kelas E di Sungai Asap.
“Opis bomba tu besai amat reti ngagai rayat dia baikka ngurangka agi pengerugi tauka nyeliah penusah bebadi nyadi ba penusah angus,” pia ku Ugak maya ngesah peranak Uma Bawang di Sungai Asap, hari Empat tadi.
Iya maya nya disempulang Kaban Kunsil Nengeri Belaga enggau Murum Datuk Liwan Lagang enggau Kennedy Chukpai Ugon.
Kelimpah ari nya, sebedau tu mega, Ketuai Publisiti Parti Keadilan Rakyat (PKR) Ulu Rejang, Umie Liau bela ngandalka perintah lengkas ngaga Opis Bomba ba menua nya.
“Ketegal ti nadai Opis Bomba semak, maya penusah enda disadang nyadi baka tu, kami di Sungai Asap minta saup bomba ari Bintulu iya ke semina ulih datai dalam dua jam setengah tauka tiga jam ngelawa menua tu.
“Maya sida datai api endang udah nganguska rumah panjai.
“Nya alai, kami ditu minta perintah anang laun berunding ngaga sebuah Opis Bomba dikena napi penusah enda disadang nyadi,” ku iya ba surat berita, empai lama.
Umie mega madah, maya dipinta perintah pindah ari rumah panjai lama sida di ulu Sungai Balui ngagai Skim Gempuru Sungai Asap suba, rayat dia nadai mayuh kelikuh ketegal meri awak ngagai perintah ngaga Tekat Ai Bakun.
Nya alai ku iya, peminta deka digagaka Opis Bomba enti nunda nadai penanggul ngagai perintah.