KUCHING: Gabungan Parti Sarawak (GPS) enda lantang ati enggau penerang ari Chairman parti keadilan rakyat (PKR) Sarawak, Baru Bian ti nuduh Kaban Parlimen GPS nyadi pengkhianat sereta ngelengkaka tanggungpengawa dalam isu Rang Undang-Undang (RUU) Konstitusyen Fasal (2) Perkara 1.
Ketuai Whip GPS, Datuk Seri Fadillah Yusof madahka, tuduh Menteri Kereja Raya iya nya laban GPS ‘abstained’(berkecuali) nadai merit, nunjukka iya (Baru) enda ngemeratka RUU nya.
Nitihku Fadillah, semua Kaban Parlimen GPS ke datai ba Dewan Rakyat nyau deka sampal ngambi bagi dalam pejurai bekaul pekara nya dikena madahka pengelemi ubah nya sereta minta ngambika nitih Sempekat Malaysia 1963 (MA63) dipasukka dikena ngenegapka agi.
“Baka ti udah diterangka aku dalam penerang berita kena 12 April apin lama, bisi pengelemi ke patut dikemetul tauka dikemanahka.
“Enti Kaban Parlimen GPS enda datai sereta enda bebendar ngemetulka pengelemi ke bisi, nya baru dipadahka enda bejalaika tanggungpengawa.
“Kaban Parlimen GPS ukai semina bejuraika aja tang udah berunding enggau semua piak nyengkaum Menteri Undang-Undang, pemesai perintah enggau penyakal Sabah nyengkaum Kepala Menteri Sabah, suah kitai betemu enggau Menteri Undang-Undang sereta enggau pemesai penyakal di Semenanjung dikena madahka penegap runding GPS.
“Lalu aku ke nyadi Ketuai Whip mega betemu enggau Menteri Besai lalu madahka penegap runding Sarawak ngambika ‘pursuant to MA63’ dipasukka dikena ngelengkapka ubah nya,” ku iya nengah penerang berita iya kemari.
Ba GPS, ku Fadillah, RUU nya ukai pekara mit ke ulih diputarka ngena chara ‘window dressing’, tang patut diputurka ti mungkur semua pekara ke pemanah rayat enggau nengeri Sarawak jemah ila.
Iya madahka, begunaka ketetiga Penyanding Penemu Undang-Undang Perintah Besai enggau nengeri ngambika duduk berandau pasal intrerpretasi undang-undang enggau tusun jaku udnang-undang ti lebih betul.
“Ba GPS, lebuh ngenang pasal mai pulai baru hak enggau pemisi khas Sabah enggau Sarawak sereta nyaga pemerat kitai, nadai patut bisi sebarang kompromi.
“Enti Baru deka isu nya siti politik, bepanggai ba iya. GPS tetap enggau pendirian iya nya enti pasal Sabah enggau Sarawak, Menteri ba Opis Menteri Besai (Undang-Undang) Datuk Liew Vui Keong ukai munsuh kitai, Chairman DAP Sarawak Chong Chieng Jen ukai munsuh kitai enggau Baru mega ukai munsuh kitai.
“GPS enda minta lebih ari nama hak kitai dalam MA63. Kitai semina deka ngenegapka sereta enggai ke bisi sebarang pengelemi dikena nyaga hak Sarawak kebendar,” ku Fadillah ti mega Kaban Parlimen Petra Jaya.
Enti kitai deka ngemetulka pekara tu, aram mih ngatur nya ngena chara betul sereta kitai ngenegapka pengelemi enggau pengurang ke bisi sebedau ngemendarka RUU ubah tu, ku iya.
Nitihku Fadillah, GPS diatu mekuh ngagai pengawa betemu enggau semua ‘pemegang taruh’ bekaul nyengkaum penyanding penemu undang-undang.