KUCHING: Pengawa ngatur “Sarawak Harvest & Folklore Festival 2019” (SHFF) deka diatur kena 26 nyentuk 28 April endang diatur ba maya ke betul.
Menteri Dagang Temuai, Seni, Main Asal, Nembiak Lumba enggau Main Datuk Abdul Karim Rahman Hamzah madahka SHFF 2019 ti deka diatur ba Kampung Budaya Sarawak nya deka nyadi penambah ngagai Kimpin Nemuai Ke Sarawak dikena narit mayuh agi temuai datai ke mengeri tu.
“Ngarika perintah nengeri nengah Opis Menteri, pengawa ngatur SHFF tu deka disambut manah laban nyadi penambah ba Kimpin Nemuai Sarawak, ti deka masuk bulan keempat.
“Pengerami nya ke diatur pengelama empat hari betul ba maya iya laban nitih ke kami melabaka mayuh temuai menua tu enggau ari men ua tasik datai ke Kuching nitihka sekeda program bukai,” ku iya.
Iya madah bakanya maya aum media bekaul enggau “Sarawak Harvest & Folklore Festival 2019” (SHFF) ti sama digulu Chairman Pengatur enggau Menijar Besai Kampung Budaya Sarawak, Jane Lian Labang enggau Sapit Menijar Besai Gerempung Pemansang Ekonomi Sarawak (SEDC) Edwin Abit ditu, kemari ensanus.
Abdul Karim nambah, kelimpah SHFF mengeri Kuching mega deka nyadi Ketuai pengatur Festival Filem Entarabansa ASEAN (AIFFA) ti deka diatur 24 nyentuk 27 April tu.
Ku iya program ninting taun nya matak lebih 100 penyereta ari semua menua ASEAN enggau mayuh bintang filem tebilang di Kuching maya minggu nya.
“Temuai tauka pesereta AIFFA ti datai taun tu engka tau diau lama mimit ditu n gambika ulih ngambi bagi ba pengerami ti diatur di Kampung Budaya Sarawak ila,” ku iya nyemetak.
Berebak enggau nya, Jane madahka SHFF deka mantaika dua iti program ke penudi endar iya nya drama muzikal enggau ensera rayat bansa Bisaya ke diberi nama ‘Dang Buncu-Keindahan Mistik Bukit Barit’ sereta final pekit ‘Ratu Cantik Pesta Menuai 2019.
“Ungkup drama muzikal nya deka diatur kena 27 April pukul 8 malam ba Kampung Budaya Sarawak lalu final pekit Ratu Pesta Menuai diatur kena 26 April pukul 8 malam ba endur ti sama,” ku iya.
Ku iya, rega tikit ungkup pengawa nya RM60 ngagai orang besai tuai lalu RM30 ungkup nembiak mit.
Sida ti bisi ati tau meli tiket terus ari Kampung Budaya Sarawak tauka ari online ba www.sarawakharvestfestival.com.my.
Peenerang silik tau betanya ngagai Grace tauka Rashida ba numbur telefon 082-826108 tauka 082-826411 tauka faks (082-846988), emel [email protected].