Anda di sini

Ubah Pekara 1(2) Konstitusyen Perintah Besai enda mujur ketegal agenda politik penyakal

Advertisement
 Chong meri penerang enggau nenak bekait MA63 ti udah isu lebuh sidang Dewan Rakat ba Miri malam kilah ensana.
NGAMBIKA NENAK: Chong meri penerang enggau nenak bekait MA63 ti udah isu lebuh sidang Dewan Rakat ba Miri malam kilah ensana.

MIRI: Chairman DAP Sarawak, Chong Chieng Jen madahka pemuntan ubah Pekara 1(2) Kontitusyen Perintah Besai 9 April tu tadi ketegal agenda politik penyakal.

Nitih ku iya, 19 iku Pengari Rayat Parlimen Gabungan Parti Sarawak (GPS) patut nyukung Rang Undang-undang ti ulih meri pengutung ngagai rayat nengeri Sarawak tang ukai nulak sepengudah nganti sepengelama 43 taun.

“Tu nyadi chara keterubah dikena ngemanahka penuduk Sarawak ti nyadi kaban ti sama dalam nuymbuhka Malaysia nitihka Sempekat Malaysia 1963 (MA63).

“Tang, ketegal 19 kaban parlimen pemangkang ti enda ngundi baka ke ngenggaika hak rakat Sarawak dikena ngulihka hak khas ti udah lama lenyau sepengelama 43 taun,” ku iya madah ngagai pengarang berita udah ke ngaga penerang ti bekait enggau MA63 malam kilah ensana.

Chong ke mega Sapit Menteri Dagang Dalam Menua enggau Orang Bebelika Barang enda lantang ati ketegal kaban parlimen Sarawak enda nyukung ubah nya baka nengeri Sabah.

“Ti nunda nama-nama mosyen ke dipejurai ke bekait enggau utai ke diguna sereta meri penguntung ngagai rayat Sarawak patut disukung laban MA63 ti dipejurai kenaka 9 April nya nitih ka asal sepengudah dikemanahka agi,” ku iya.

Chong nambah, ketegal 19 iku Kaban Parlimen GPS ti ngengggaika kontitusyen nya lalu ngasuh ubah nya enda dikereja.

Lebuh ditanya sekalika kontitusyen nya dipejuraika baru Dewan Rayat, Chong madah nya bepanggai ba penuduk GPS.

“Ketegal Kontitusyen nya enda dikendarka, Sarawak agi sama baka 13 nengeri ke bukai lalu nya siti pengerugi laban semua hak Sarawak ke udah lenyau sepengelama 43 taun tu meruan baka selama,” ku iya.

Ku iya nambah, kontitusyen tu siti awak ti manah dikena ngemanah ka penuduk Sarawak ti nyadi kaban kunsi sama bela dalam penumbuh menua Malaysia.

Menteri Besai Tun Dr Mahathir Mohamad ba dalam nyimpul jaku jurai madahka Sabah enggau Sarawak ukai semina nengeri aja tang mega kaban kunsi sama bela Perintah Besai Tanah Melayu, lebuh maya begulai numbuhka Perintah Besai Malaysia.

Enggau nya, Menteri Besai enggau Kaban Parlimen PH setuju enggau ubah Pekara 1(2) ti udah meri Sabah enggau Sarawak nyadi nengeri ti sama bela enggau 13 nengeri kebukai lalu pengawa ke bechiping tu udah nyadi 43 taun tiudah..

Rakat Sabah enggau Sarawak ngembuan pengingin ati deka ngemetulka utai ti salahl alu ngarapka bala kaban-kaban politik ngiar ke tisi bida politik sida dikena meri penguntung ngagai negeri sida iya empu.

Ketegal 19 iku Kaban Parlimen GPS ti enda nyukung kontitusyen tu, nya ngasuh ubah tu puntan dikereja.

Penyampau 138 undi PH enggau Kaban Parlimen ari aprti pamangkang Sabah agi enda chukup 10 undi lalu enda datai dua pertiga ari undi diguna dikena ngemendarka ubah kontitusyen.

Sama bela datai Kaban Dewan Negara Senator Alan Ling, Kaban Parlimen Miri, Dr Micheal Teo enggau Kaban Kunsil Nengeri Pujut, Dr Ting Tiong Choon.

Advertisement