MIRI: Raban nembiak rebak baru saritu patut nguasa ekonomi digital dikena nyungkak pelin perintah Sarawak dalam ngemansangka nengeri tu ba taun 2030.
Kaban Kunsil Nengeri (ADUN) Telang Usan ke mega Kaban Kaunsil Amanah Tegas Dennis Ngau madahka, ekonomi digital deka ulih ngubah ekonomi Sarawak iya nya ekonomi digital tu deka meri 17.4 peratus ngagai Pemansut Kasar Asil Dalam Menua (KDNK) ba taun 2025.
Ku iya madah, ekonomi digital deka mekuh ngagai makit global kelimpah ari ngaga peluang ke besai agi ngagai rayat.
“Reti nya, ekonomi digital deka ngerapitka seraka sosioekonomi rayat, nyungkak peluang dagang nengah e-Dagang, nyediaka penatai pemisi nengah inovasyen sereta pengawa dagang, lalu muka peluang gawa dalam raban nembiak.
“Berindik ari nya, raban nembiak diatu patut ulih nentuka pengawa sida senipak enggau ubah kemaya hari ti dibai ekonomi digital,” ku iya bejaku lebuh ti bejadi ‘Roadshow Projects of Dreams Realized’ (Pro-DR) 2019 ba sebuah hotel ditu bedau lama.
Ku Dennis nambah, kus teknologi pemadah enggau komunikasyen (ICT) diatu enda chukup, nya alai raban nembiak patut ngambi kus koding enggau ‘pengaturcaraan untuk mengaktifkan robot’, ‘dron’, ‘artificial inteligence’ tauka ngemansangka mayuh aplikasyen ti ulih ngemuntangka gaya idup mensia.
Kelimpah ari nya, ba renggat sekula, nembiak patut diajar enggau pelajar STEM iya nya Sains, Teknologi, Injiniring enggau Matematik.
Ku iya, nengah pemansang dalam inovasyen digital, semua penemu enggau penerang pemun ulih diambi nengah ‘Google’ lalu laban nya mih TEGAS taun tu udah numbuhka ‘Mini STEM Playground 6’ semanjai Pro-DR Roadshow.
“STEM Playground siti ari pengawa pemandang interaktif ti ngena konsep kreativiti enggau inovasyen dikena pengandal bekaul STEM ba bala nembiak ti ulih dipelajar sida enggau chara terus sereta merindang ati.
“Aku ngarap bala nembiak ulih ngena ProDR Roadshow tu enggau memanah. Nyadi pengarap perintah Sarawak ti deka ngadaka mayuh agi pengereja pengawa digital dikena ngemansangka pelin Sarawak dalam ngemansangka Sarawak ba taun 2030 nengah Ekonomi Digital,” ku iya.
Iya mega meri besai pengaga ati ngagai TEGAS ti udah mujur ngatur ‘Roadshow Pro-DR’ ba taun tu.
Pejalai pengawa pemandang ti pemadu besai di Sarawak ke digaga sepengelama tiga minggu tu endang ungkup khas dikena ngenataika penerang dalam peluang pelajar, latih sereta bantu pelajar ngagai bala nembiak di selampur Sarawak kelebih agi sida ti udah tembu SPM enggau STPM.
Bisi 45 buah institusyen enggau ejensi udah nyereta program tu.