SIBU: Perintah besai semampai naka alah nyendiaka perengka guna ke manah ngagai rayat ngambika sama bela ngasaika pemansang menua.
Kaban Parlimen (MP) Lubok Antu Jugah Muyang madah, pengeransing perintah tu bepun ari deka mai rayat ngulihka penatai pemisi ke manah dikena ngangkatka tikas pengidup di menua pesisir.
“Pekara tu nyadi batang pekara dikemeratka perintah besai.
“Nya alai, perintah ngelanggur bemacham bengkah projek ungkup rayat nyengkaum di menua pesisir,” pia ku iya madah.
Iya mantaika pekara tu maya ngulu pengawa nasih taba rumah panjai baru, Rumah Amu Sengkuang, Tinting Kemayau di Lubok Antu, empai lama tadi.
Jugah mega madah, perintah besai endang bebendar ngaduka pemansang ngambika rayat menua pesirir enda tinggal pemansang ari kandang mengeri.
“Taja pia, kitai minta rayat baka di Parlimen Lubok Antu meri kerejasama ke tegut ngagai perintah besai maya pengawa ngaga pemansang ungkup sida,” ku iya madah baru.
Kelimpah ari nya, sukung ari rayat ku iya, beguna dikena nentuka pelin pemansang perintah Pakatan Harapan ulih digaga enggau lantang.
Pengawa nasih taba rumah panjai baru enggi peranak 21 pintu nya siti berita ke manah ngagai sida kelimpah ngasaika pengawa sehari nya nyadika pemeri nyerumba Gawai Dayak ti deka datai.
Nambahka nya, pengawa nyungkur taba alai ngentak baru bela deka dikereja enda lama agi.