KUCHING: Optimis, berunding enggau positif sereta deka ngapil ngagai perintah besai nengah Opis Menteri Pelajar (KPM) bekaul enggau bayar kontra RM1 bilion ngagai perintah besai ari perintah nengeri dikena mutarka isu sekula ti udah kelalu repuk di Sarawak.
Menteri Pelajar, Sains enggau Pansik Teknologi, Dato Sri Michael Manyin Jawong madah, iya deka betemu sereta berandau enggau Menteri Pelajar Dr Maszlee Malik bekaul enggau pekara nya.
“Aku deka ngaga semaya betemu enggau Menteri Pelajar sereta aku udah nyendiaka surat. Aku deka betemu enggau iya (Dr. Maszlee) ni maya iya ulih, engka ujung bulan tu.
“Kami deka berandau sereta ngapil, tu chukup ensiban ati laban mayuh sekula kitai ti udah kelalu repuk sereta mayuh ke suah dipindah ketegal kena penusah ampuh bah.
“Kitai tetap ngarap bulih jaku setuju tauka pemutus ti manah pengudah tu. Aku enggau naka ulih deka betemu enggau Menteri Pelajar sereta aku udah nyendiaka semua dokumen,” ku iya lebuh dikerandau raban pengarang berita, kemari.
Dulu hari nya Manyin sama bisi datai ngulu pengerami Konvokesyen Ke-19 Swinburne University of Technology Sarawak Campus ti diatur ba sebuah hotel ditu.
Ngenang pekara nya nya, Manyin madahka Kepala Menteri Datuk Patinggi Abang Johari ti keterubah nulis surat sereta sedia nyendiaka RM1bilion ngagai perintah ke diatu, taja pan kebendar iya perintah nengeri enda ibuh ngereja nya laban ari baruh Bajet 2018, pekara nya udah dikemendarka perintah besai ke sebedau tu.
Kebendar ku Manyin, RM1 bilion nya dibagi dua iya nya RM500,000 ungkup taun 2018 lalu RM500,000 ungkup taun 2019, reti nya (RM1 bilion) nya nadai agi tang pekara nya enda diterima perintah besai ke diatu.
Beduduk ari pekara nya ku iya, perintah nengeri berunding lalu Kepala Menteri madahka deka nyendiaka RM1 bilion nengah chara nyali tang nadai nerima saut positif, lalu udah nya deka nyendiaka RM1 bilion nya nyadi bayar kontra enggau duit ke diinjau perintah nengeri RM2.3 bilion.
“Taja pia duit nya dipegai tauka ditaruh di Sarawak. Nya penemu ke udah dipesetuju Menteri Pelajar maya betemu enggau Kepala Menteri kitai dalam bulan Februari taun tu tadi.
“Tang seminggu udah nya, pengereja pengawa kami dikangau dke Putrajaya ke alai sida lalu ngaga pemutus nya,” ku iya.
Manyin lebuh ditanya sekalika bisi penanggul deka ngulihka pemutus ti manah udah tu ila enggau perintah besai, iya nyaut madahka engka baka nya tang kitai agi ngarapka sereta nyikap diri betemu enggau menteri nya.
“Kitai terus besampi. Kitai seruran berunding enggau chara positif, nyadi optimis,” ku iya.
Pun bulan April tu tadi, Putrajaya nengah Opis Menteri Pelajar enda nerima chara bayar kontra RM1 juta ti dipesetuju sebedau tu enggau Perintah Sarawak dikena mutarka isu sekula repuk ba nengeri tu.
Chara bayar kontra nya dipesetuju entara Kepala Menteri Datuk Patinggi Abang Johari Tun Openg enggau Menteri Pelajar Dr Maszlee malik ditu, bulan Februari tu tadi.