Anda di sini

JKM meri bantu ngagai peranak di Uma Bawang ti dituntung penusah angus

Advertisement
 Kennedy, Dariel (enam enggau tujuh ari kanan) begulai enggau bala JKM kebukai nyua bantu ngagai peranak Uma Bawang SUngai Koyan ti dituntung penusah angus.
BANTU: Kennedy, Dariel (enam enggau tujuh ari kanan) begulai enggau bala JKM kebukai nyua bantu ngagai peranak Uma Bawang SUngai Koyan ti dituntung penusah angus.

BELAGA: Bisi 416 sida ti udah tasah dituntung penusah angus ba rumah panjai, Uma Bawang Sungai Koyan ba Skim Pengentap Baru Sungai Asap Belaga udah nerima bantu ari Opis Pengintu Pengelantang Mensia Mayuh (JKM) kemari.

Bantu nya baka barang pemakai enggau utai diguna besehari-hari udah diberi ngagai semua peranak ba rumah panjai nya lalu penusah tasah angus tu nyadi kenaka pukul 6 lemai Hari Satu,15 April lalu nganguska 43 pintu bilik rumah panjai nya.

Pemesai Opis Pengintu Pengelantang Mensia Mayuh bagi menua Kapit Dariel Thiong Yiew Seng madahka, sepengudah nerima berita penusah angus ba Sungai Asap, JKM lalu nganjung raban ari opis nya dikena meri bantu ti tumu enggau mega deka meda nama utai ti diguna bala sida ke ditinggang tasah laban penusah angus nya.

Kelimpah bantu ari JKM Pelilih Kapit, Opis JKM Pelilih Bintulu mega bisi meri bantu barang pemakai enggau perengka  diguna ninting hari, pia mega perengka kebukai ngagai sida ti tasah angus.

Bantu tumu nya diberi lalu udah dipenyadi Kaban Kunsil Nengeri (ADUN) Murum Kennedy Chuk Pai Ugon.

Lalu baka ke dipadah, semua sida ti ditinggang penusah tu kediatu diau enggau bala kaban belayan sida ke semak dia ba Blok A, B enggau C.

Nitih ku penerang sida ti meda penusah tu nyadi madahka, penusah angus tu bepun ari Blok D lalu ngelekai ngagai Blok E enggau gerija ke semak nya lalu sida ari Opis Pengerara Api enggau Penyah Penusah ulih madamka api ari terus ngelekai ngagai endur kebukai.

Advertisement