SIBU: Industri seni di menua tu ulih nyadi batang industri penatai pemisi bepun ari pengelebih rayat iya ti ngembuan pengelandik bejaku lebih ari siti bansa jaku.
Kaban Parlimen (MP) Sibu Oscar Ling madah, pengelebih tu ngelantang orang ti landik ba seni ngerembaika pengawa sida ukai semina ba menua Malaysia aja.
“Ambika banding, kita ke landik belagu nyentuk nyadi artis nadai penanggul ngerembaika pengelandik belagu ngagai menua Indonesia ketegal rayat dia nemu Bahasa Malaysia.
“Pia mega, rayat kitai bela landik bejaku Mandrin ti tau merindang ngagai menua China lalu iya ke landik ba Jaku English lantang agi ngerembaika pengelandik ngagai dini-dini menua.
“Nya alai, pengelandik tu deka nyungkakka agi industri seni menua tu nyentuk nyadi batang industri penatai pemisi betikas dunya,” pia ku iya madah.
Iya mantaika jaku tu maya bejadi Pertandingan Nyanyian Solo Irama Malaysia enggau Pertandingan Kombo Sekolah Menengah renggat sitak Sibu ditu, kemari.
Oscar madah, suba menua tu lebih agi ngemeratka pemujur pelajar tang diatu perintah deka meda pemujur pelajar sebela enggau kokurikulum.
“Perintah deka meda nembiak sekula ukai semina landik ba pelajar aja tang ngembuan mayuh pengelebih ke bukai nyengkaum ba pengelandik seni.
“Mayuh awak tau diambi bala nembiak sekula dikena nyungkakka agi tikas pengelandik diri,” ku iya ti endang orang rinduka pengawa seni alai iya orang keterubah ngatur Sibu Music Festival taun siti tadi.
Kelimpah ari nya, Oscar madahka diri ransing mai bala nembiak chakah ba pengawa luar tauka iya ke ukai bekaul enggau pelajar dalam sekula.
Ketegal nya, iya merambu deka ngatur pekit E-Sport ditu nangkan ke tu ila dikena meri awak ngagai bala nembiak Sibu mantaika pengelandik ba pengawa nya.
“Perintah Malaysia udah ngenukuka E-Sport di menua tu laban udah ditemu tau nyadi pun penatai pemisi ke manah.
“Ari nya, aku ngasaika di Sibu patut alai kitai ngatur siti pekit E-Sport ungkup bala nembiak,” pia ku iya madah.
Ba pengerami nya, Oscar udah nyuaka pemeri iya sepenyampau RM2,000 dikena nyaup ngemujurka pekit sehari nya.