KUCHING: Pengawa nyadung dadah di Sarawak ngayanka ‘trend’ ti berupai majak nambah taun tu, berindik ari penyakah strategi, operasyen enggau pansik ti bisi dipejalaika di serata nengeri tu.
Ketuai Opis Mansik Penyalah Narkotik (JSJN) Sarawak, Polis DiRaja Malaysia, Superintenden Sahar Abdul Latif madah, Sarawak dalam taun 2017 ba tangga ke 12 ari 14 nengeri ti ngerikod penyampau pemayuh penyadung.
“Dalam timpuh tiga bulan keterubah taun tu Sarawak niki dua anak tangga iya nya ke-10.
“Kebuah niki laban kitai ti udah nusun baru startegi, nusun baru operasyen enggau pansik.
“Nambahka nya penyedar mensia mayuh mega majak tinggi laban udah bisi ke berani meri penerang, nya kebuah penyampau nya nambah,” ku iya ti enda madahka penyampau pemayuh penyadung ke ditemu di Sarawak.
Sahar mansutka pekara nya dalam licha aum pengarang berita bekaul chara mutarka penanggul dadah, ‘macau scam’ enggau ‘love scam’ ti diatur ba bilik opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah ditu, kemari.
Berebak enggau tu, Sahar madahka sida iya balat agi mekuh ngagai penyadung kelimpah ari mutarka kes dadah di nengeri tu.
“Bepelasarka statistik tiga bulan keterubah taun 2019, kitai mujur nangkap 275 iku penyadung. Penyampau tu nyau deka setengah ari penyadung dua taun sebedau tu.
“Dipelabaka nyentuk bulan Disember taun tu, kitai arap tauka ulih chakah agi ngemuntanka (penyadung) dikena ngurangka pangka dadah di Sarawak.
“Chara kitai napi sereta mutarka kes dadah di Sarawak iya nya keterubah ninggangka ukum ngagai penyadung; kedua, ninggangka ukum ngagai penguna enggau ketiga ngerampas reta penyadung,” ku iya.
Bejaku baru Sahar, madahka penyampau rega reta penyadung ke ditangkap mega sepenyampau urung RM1 juta dalam timpuh tiga bulan keterubah 2019.
Lalu dalam bulan Mei taun tu, bepelasarka proses ti dipejalaika dipelaba penyampau rega reta penyadung ke ditingkap engka urung RM3 juta, ku iya.
Kelimpah ari nya, lebuh ke ngenang penguna dadah di Sarawak, iya madahka di serata Sarawak dalam timpuh tiga bulan keterubah taun tu udah ngerikod 658 penguna ditangkap.
Lalu bekaul enggau nembiak sekula ti nyadi penguna dadah, Sahar madahka nya nyadi kes bukai laban nembiak dianggap siti indikator ti enda manah ba mensia mayuh ti udah kelalu tumu betapi penanggul dadah.
“Naka ke diripot ngagai Narkotik ari Februari ngagai Mac (2019) bisi 118 iku nembiak positif ai kemi (dadah).
“Nya alai nama ke dikereja kitai diatu iya nya ngiga sapa penyadung. Kitai enda diau diri ba pekara tu laban Narkotik nganggap nembiak nya anak,” ku iya.
Berebak enggau tu Fatimah madahka pekara bekaul enggau penyalah dadah seruran nyadi isu ke dibantaika mensia mayuh maya pengawa berandau enggau Kaban Kunsil Nengeri tetiap kali aum diatur.
“Taja pan penyampau nya niki, kitai ngasaika asil ari kerejasama Polis DiRaja Malaysia enggau ejensi ti bekaul kitai ulih chakah agi bejalaika pengawa nangkap penyadung enggau penguna dadah,” ku iya.