Dikarang Rengenyan Labang
KUCHING: Opis Menteri Pelajar, Sains enggau Pemansik Teknologi agi optimis sereta deka ngapil ngagai Opis Menteri Pelajar Malaysia (KPM) bekaul enggau bayar kontra RM1 bilion ngagai perintah besai ari perintah nengeri dikena mutarka isu sekula ti udah kelalu repuk ba Sarawak.
Menteri Pelajar, Sains enggau Pemansik Teknologi, Dato Sri Michael Manyin Jawong (gambar) madah iya deka betemu sereta berandau enggau Menteri Pelajar Dr Maszlee Malik bekaul enggau pekara nya.
"Aku deka ngaga semaya betemu enggau Menteri Pelajar sereta aku udah nyendiaka surat. Aku deka betemu enggau iya (Dr. Maszlee) ni maya iya ulih, engka ba ujung bulan tu.
"Kitai deka berandau sereta ngapil, laban pekara tu chukup ensiban ati kitai laban mayuh sekula kitai ti udah kelalu repuk sereta mayuh ke suah dipindah ketegal kena penusah bah.
"Kitai tetap ngarap bulih jaku setuju tauka pemutus ti manah pengudah tu. Aku enggau naka ulih deka betemu enggau Menteri Pelajar sereta aku udah nyendiaka semua dokumen," ku iya lebuh dikerandau raban pengarang berita, sehari tu.
Dulu hari nya Manyin sama bisi datai ngulu pengerami Konvokesyen Ke-19 Swinburne University of Technology Sarawak Campus ti diatur ba sebuah hotel ditu.
Pun bulan April tu tadi, Putrajaya nengah opis Menteri Pelajar enda nerima chara bayar kontra RM1 bilion ti dipesetuju sebedau tu enggau Perintah Sarawak dikena mutarka isu sekula repuk ba nengeri tu.
Chara bayar kontra nya dipesetuju entara Kepala Menteri Datuk Patinggi Abang Johari Tun Openg enggau Menteri Pelajar Dr Maszlee Malik maya ti biai betemu sereta berandau ditu ba bulan Februari tu tadi.