KUCHING: Pakatan Harapan (PH) Sarawak nguji ngambi peluang dikena ngentapka politik sida lebuh Gabungan Parti Sarawak (GPS) enda ngundi mosyen ba Ubah Pekara 1(2), Kontitusyen Perintah Besai bedau lama udah.
Menteri Muda Undang-undang Sharifah Hasidah Sayeed Aman Ghazali madah, GPS semina deka ke rang undang-undang nya ditanya baru ngagai Komiti Bepilih Parlimen ngambika nenak agi.
“PH nguji ngerachun runding rayat Sarawak nengah chara meri label GPS enggau mayuh macam gela. Semua nya ngembuan tuju dikena ngulihka sukung politik aja.
“Enti sida setuju enggau kitai (GPS), sida deka dipeda lemi lalu sida mega nadai utai ti deka ditegika agi,” ku iya kemari lebuh dipinta ngenang isu ke bekaul enggau pemuntan Dewan Rayat Hari Dua nyin tadi ti ngujungka RUU nya enda dikemendarka.
Rang undang-undang nya enda dikemendarka pengudah enda teulihka undi dua pertiga ari Kaban Dewan Rakyat.
Hasidah nengah sebengkah penerang kemari lebuh ngenang senentang jaku ke diambi ari Kaban Parlimen Bandar Kuching Dr Kelvin Yii ti madahka GPS enda kala madah deka ngemasukka elemen Sempekat Malaysia (MA63) ba ubah nya.
Ku iya, rayat Sarawak sigi nganti ubah nya tang nya patut diperatika enggau manah agi sereta mungkur semua.
Rayat Sarawak ku iya, enda patut arapka nama utai ti didinga sida laban nya semina utai selebubu ngapa.
Iya mega minta rayat macha isi ke udah ditulis dalam Konstitusyen Perintah Besai, Sempekat Malaysia 1963(MA63) enggau Ripot Komiti Entara Perintah (IGC).
“Bacha sereta peretika pejurai kami. Kami bekereja ketegal Sarawak ti dikesayau lalu ukai semina deka ngulihka sukung ari bala mayuh baka parti bukai,” ku iya.
Pemutus enda ngundi endang diaku iya mar amat ,taja pia ketegal Sarawak nya tetap dipejalaika.
“Kami ba GPS sigi tetap ngaduka semua pengawa enggau bejimat, ukai ketegal deka dikelala orang,” ku iya.