Dikarang Matthew Bill
KUCHING: Penyampau temuai ti nemuai ngagai Sarawak dalam timpuh tiga bulan ke keterubah taun tu, bisi ngerikod sepuluh peratus taun tu enti dibandingka enggau ba timpuh ke sama taun siti nyin.
Menteri Dagang Temuai, Seni, Main Asal, Nembiak Lumba enggau Main Datuk Abdul Karim Rahman Hamzah madah, penyampau nya ari suku keterubah penatai temuai pengudah Kimpin Nemuai Sarawak dilancharka.
"Ari Januari nyentuk Mac kitai udah ngerikod penambah 10 peratus tauka 300,000 iku penemuai ungkup tiga bulan keterubah enti dibandingka enggau ba timpuh ke sama taun siti nyin tadi.
"Penyampau tu iya nya ari suku keterubah pengudah Kimpin Nemuai Ke Sarawak ti dipenyadika maya malam 31 Disember 2018," ku iya madah ba aum pengarang bekaul enggau Sarawak Harvest & Folklore Festival 2019 (SHFF) ditu, sehari tu.
Iya madah, Januari 2019 ngerikod penatai temuai ke pemadu mayuh iya nya 60 peratus enti dibandingka enggau Januari 2 018.
Iya madah, iya pechaya penambah penatai bala temuai ke Sarawak nya bepelasarka pengerami ti diatur di nengeri tu.
"Kena bulan Januari tu tadi, lebih 60 peratus penyampau penatai temuai enti dibanding enggau bulan Januari ke sebedau tu.
"Tu mandangka program nya bepelasarka pengerami tauka atur pengawa ti diatur kitai, ke alai mayuh agi pengerami, mayuh agi bala temuai deka datai," ku iya madah nyemetak.
Entara pengerami besai ti diatur Sarawak dalam bulan Januari tu tadi nyengkaum nyadi tuai pengatur Anugerah Televisyen Asia (ATA) Ke-23 ba Palan Konvensyen Borneo Kuching (BCCK) kena 11 enggau 12 Januari tu tadi.
Program ke diatur pengelama dua hari nya mantaika urung 60 iku selebriti tebilang ari sekeda menua Asia.