Anda di sini

‘Love scam’, ‘macau scam’: Anang kelalu jampat pechayaka orang bukai

Advertisement
 (Ari kanan) Moliza, Sahar, Harden, Fatimah enggau Rosey sereta ke bukai ngayanka plakad #CAREFORSARAWAK, ti minta mensia mayuh ngambika ngeripot sereta enda mudah pechaya ke orang ti enda dikelala. — Gambar Chimon Upon
ANANG MUDAH PECHAYA KE ORANG: (Ari kanan) Moliza, Sahar, Harden, Fatimah enggau Rosey sereta ke bukai ngayanka plakad #CAREFORSARAWAK, ti minta mensia mayuh ngambika ngeripot sereta enda mudah pechaya ke orang ti enda dikelala. — Gambar Chimon Upon

KUCHING: Bepelasarka pansik, ngayanka ulah sesiku orang ti jampat pechaya ngujungka mudah nyadi orang ke kena kelakar nengah sindiket ‘love scam’ enggau ‘macau scam’ di nengeri tu.

Sapit Ketuai Opis Mansik Penyalah Komersial Sarawak (JSJK) DSP Moliza Tauk madah, bepelasarka pansik enggau kes ke nyadi tebal agi orang ti nyadi napi penusah ba kededua pengawa ngelakar nya, orang ti bisi pelajar.

“Kebendar ukai semina orang indu ke nyaga ruang bilik aja ti mudah dikelakar nengah ‘love scam’ tang mega nyengkaum ke gawa ba opis peribit enggau perintah.

“Bepelasarka statistik ngayanka orang ti kena kelakar tu sebela, tang tebal agi ti kena kelakar nya orang ti kereja, tu engka sekalika sida nya sunyi tauka ketegal bukai.

“Nya alai, kelebih agi orang indu nyengkaum ke bisi pemandai di nengeri tu patut cheremat agi sereta anang kelalu pechaya ke orang ti enda dikelala tauka orang ti mai bekelala baka nengah Facebook (FB),” ku iya lebuh dikerandau.

Dulu ari nya Moliza meri penerang bekaul enggau ‘love scam’ enggau ‘macau scam’ ba licha pengarang berita ti diatur ba bilik opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah ba Begunan Baitulmakmur ditu, kemari.

Bepelasarka statistik Opis Mansik Penyalah Komersial Sarawak dalam timpuh 1 Januari ngagai 11 April 2019 bisi 30 iku kena kelakar kes ‘love scam’ ti nyengkaum 14 iku ti gawa ba opis peribit, tiga iku (opis perintah) enggau 13 iku ke nadai kereja.

“Aku ngelalau raban kitai orang indu, enti ba FB anang kelalu engkah enggau silik pasal diri baka kereja, gambar rumah tauka pengidup ti kaya sereta nama kereja diri.

“Laban kekadang orang ti bejalaika sindiket tu sida endang udah bejalaika pansik dulu pasal profil, kereja enggau gaya pengidup orang sesiku nya,” ku iya seraya ngelalau raban orang indu ngambika enda mudah lela ati meda penyigat gambar orang ke mai bekelala dikena nyeliahka diri ari nikelakar.

Berebak enggau tu lebuh ti ngenang pasal ‘macau scam’, Moliza madah, ukai semina nyadi ba orang indu tang mega orang lelaki pan bisi dikelakar nengah ‘macau scam’.

Ku iya, sindiket nya seuah betelefon sereta madah ngagai orang ke deka dikelakar nya  baka bisi bayar chukai betangguh, kad kredit, akaun bank enggau ke bukai, taja pan ke bendar orang ti deka dikelakar nadai ngembuan nya.

Berindik ari nya, iya ngelalau mensia mayuh ngambika lebih cheremat sereta enda mudah arapka kangau telefon ari orang ti enda dikelala.

Bepelasarka statistik ari  Opis Mansik Penyalah Komersial Sarawak, dalam timpuh 1 Januari ngagai 11 April 2019 bisi 34 iku dikelakar nengah ‘macau scam’ nyengkaum 15  iku gawa ba opis peribit, lima (opis perintah) sereta 14 iku nadai kereja.

“Enti kita nyaut telefon orang ti enda dikelala tau engkah ke aja, lalu nyema orang nya telefon baru anang nyambut.

“Ambika chunto, nyema iya madahka diri ari sesebuah bank anang lalu jampat pechaya, nama ke patut iya nya lawa bank nya ke semak lalu tukuka dulu,” ku iya.

Bepelasarka statistik Penyalah Komersial Sarawak bekaul enggau kes ‘macau scam’ enggau ‘love scam’ ba taun 2017 bisi ngerikod 73 kes ‘macau scam’ enggau 111 kes ‘love scam’.

Pengerugi ari kes ‘macau scam’ ba taun 2019 iya nya RM1,098,173.58  lalu pengerugi ari kes ‘love scam’ RM1,258,494.98, ti dikutka ba taun 2019 naka ke diatu.

Sama bisi datai kemari Menteri Muda Orang Indu, Runag Bilik enggau Pemansang Nembiak Mit Rosey Yunus, Menteri Muda Pengelantang Pendiau Raban Bansa Datuk Francis Hollis, Ketuai Opis Mansik Narkotik Sarawak (JSJN) Superintenden Sahar Abdul Latif sereta ke bukai.

Advertisement