KUCHING: Berapa buah organisasyen di Sarawak diperansang ngena pemaik ari program nyungkak produktiviti ti diatur Gerempung Produktiviti Malaysia (MPC) Kandang Nengeri Sarawak ungkup taun 2019.
Menteri Muda E-Dagang Datuk Haji Naroden Haji Majais madah, pengerami tu nyengkaum program produktiviti ti dipejalaika MPC Sarawak.
Pengerami ‘Team Excellence’ iya nya siti ari inisiatif ti dikena nempa organisasyen ngambika ulih besemekih agi. Pengawa tu endang sigi bisi meri pemansang dikena nurunka ungkus sereta masau jam sereta dikena nambahka agi kualiti produk enggau servis.
Berebak enggau tu, atur aktiviti tu siti ari singkang ti beguna endar setipak enggau pengawa perintah nengeri ke nyingkang nuju dunya ekonomi digital nengah chara ngenegapka perengkaguna ICT.
“Aku berasai temegah ati laban udah datai ngulu Pengerami Nutup Konvensyen ‘Team Excellence’ (MTEx) kandang menua Sarawak 2019”, ku iya. Sepenyampau 20 iti tim ari opis perintah enggau peribit ke udah enggau ba konvensyen tu.
“Tu siti ari pekara ke manah endar ngambika ulih ngemansang produktiviti enggau inovasyen enda ngira ba dedini alai laban pengawa tu endang meri penguntung besai ngagai menua kitai.
Ku iya baru, aku pecaya semua pengawa tu endang mai pemansang ngagai semua raban bansa kelebih agi ba penemu teknologi enggau pemadah (ICT).
Sama bisi ngulu pengerami nya Menijar Kanan MPC Sarawak Waila Mohd Nasir ba ditu kemari.