Anda di sini

Balai Bomba patut digaga lengkas di Sg Asap

Advertisement
UMIE LIAU
UMIE LIAU

SIBU: Semina dalam kandang lima bulan aja, dua buah rumah panjai di Sungai Asap, Belaga udah angus.

Keterubah, rumah panjai enggi bansa Kenyah di Uma Bakong angus bulan November 2018 ke alai 30 pintu bilik dia abis angus.

Lalu lemai ensana, penusah tu nyadi nuntung rumah panjai di Uma Bawang.

Nangi penusah nyadi baru, Ketuai Publisiti Parti Keadilan Rakyat (PKR) Ulu Rejang, Umie Liau andal amat perintah enggau lengkas ulih ngaga siti Opis Pengerara Api enggau Penyah Penusah(Bomba)di Sungai Asap.

“Ketegal ti nadai Opis Bomba semak, maya penusah enda disadang nyadi baka tu, kami di Sungai Asap minta saup bomba ari Bintulu iya ke semina ulih datai dalam timpuh dua jam setengah tauka tiga jam ngelawa menua tu.

“Maya sida datai api endang udah nganguska rumah panjai.

“Nya alai, kami ditu minta perintah anang laun berunding ngaga sebuah Balai Bomba dikena napi penusah enda disadang nyadi,” pia ku iya nengah penerang media,kemari.

Iya mantaika jaku tu bepun ari penusah angus ke udah dua kali nyadi nuntung sida semenua.

Umie mega madah, peranak di Sungai Asap nadai mayuh jaku maya dipinta perintah pindah ari rumah panjai lama sida di ulu Sungai Balui ngagai Skim Gempuru Sungai Asap suba.

Sida ke pindah nya ku iya ketegal ti mendingka jaku perintah ke deka ngaga Tekat Ai Bakun.

“Tang udah lebih 20 taun, kitai enda nemu nama kebuah nyentuk ke sehari tu perintah enda tegagaka Balai Bomba di Sungai Asap,” ku iya madah baru.

Ku Umie, iya baka bala bukai bela enggai penusah angus nyadi baru nuntung sida semenua.

“Berindik ari nya, kami ngarapka peminta kami tu ulih dikemanaka perintah enggau lengkas,” pia ku iya madah.

Kilah ensana, penusah angus rumah panjai di Uma Bawang dipadahka nyadi urung pukul 6 lemai.

Tu ngujungka beratus iku peranak rumah panjai nya nadai endur ngenduh agi.

Rumah panjai tu sebagi ari 15 buah rumah panjai ke bukai dientak dalam taun 1996 ba skim gempuru nya.

Penyauh Sungai Asap ari Bintulu iya nya 250 kilometer.

Advertisement