Anda di sini

Ubah RUU ke enda bulih sukung nadai reti agi

Advertisement
 Asfia (tengah) begambar kenang enggau Yahaya (empat kiba) sereta temuai bukai lebuh ke nerima penemuai basa di Begunan DUN kemari.
KE PENGINGAT: Asfia (tengah) begambar kenang enggau Yahaya (empat kiba) sereta temuai bukai lebuh ke nerima penemuai basa di Begunan DUN kemari.

KUCHING: Rang Undang-Undang (RUU) Konstitusyen (Ubah) 2019 ti enda bulih sukung dua pertiga majoriti undi ari kaban dewan rakyat kena 9 April tu tadi, tau dipadahka nadai reti agi.

Speaker Kunsil Nengeri (DUN), Datuk Amar Mohd Asfia Awang Nassar madah, ubah konstitusyen ti dilanggur ba keterubah iya endang ubah tang ukai nyadi ubah.  

“Nya semina bemain enggau jaku lalu nusun baru nengeri,” ku iya ba aum media sepengudah nerima penemuai raban ari opis DUN Terengganu ti betuaika Yang Dipertua DUN Terengganu, Yahaya Ali ba Begunan DUN kemari.

Asfia madah, Perintah Besai enda tau enda meri tanda  basa ngagai Sempekat Malayia 1963.

“Udah balat pekara tu disebut mensia mayuh. Tang aku deka madahka MA63 tu ukai semina sempekat entarabansa.

“Nya mega siti ari pekara ti disain perintah baka Great Britain, Perintah Besai Tanah Melayu, Singapura enggau Kandang menua Borneo,” ku iya.  

Ku iya, MA63 disain kena 9 Julai 1963 lalu direjista ba Gempung Gerempung Bangsa-Bangsa Bersatu.  

“Barang bagi ubah ba pekara tu, sesapa aja enda tau kelimpah diberi pemendar sereta bisi sukung ari semua ke nyain sempekat nya,” ku iya seraya madahka iya bisi  ba parlimen maya RUU dipejuraika.

“Nya alai, kitai (Sarawak) enda tau enda nyukung MA63, enti enda pia, tau disemaka baka nembiak ti madahka diri  enda ngaku setipikit pengada iya laban setikit pengada Malaysia nya MA63.  

“Kitai enda ulih ngaga sempekat 1957 nyadika pelasar laban Suruhanjaya Cobbold udah nyata. Konstitusyen 1957 semina pelasar ke enda tau dititihka magang,” ku iya.  

Sentang aum DUN ti deka berengkah kena 29 April tu ila, Asfia madahka, iya manataika sebengkah penerang rasmi ke silik maya meri penerang-aum.

Advertisement