TATAU: Serakup Anak Tatau tauka dikelala agi enggau nama Perantau, sebengkah organisasyen ukai dikuasa perintah (NGO) ba pelilih menua Tatau mujur meri teladan ke manah ba pengawa ngenataika pinta rayat ngagai ngagai opis bekuasa ke bekaul.
Menteri Muda Undang-Undang enggau Adat Bumiputera Datuk John Sikie Tayai ke mega pengari rayat Kakus pechaya, Perantau ulih nyadi teladan ngagai pemansang ba fizikal enggau modal mensia laban sada Perantau nya sada ari rayat.
Iya bejaku munyi nya lebuh bejadika aum besai ninting taun (AGM) Ke-3 Perantau ungkup 2019-2021 ba dewan SK Tatau bedau lamaudah.
“Perantau mega bekerejasama rat enggau ADUN Jepak enggau Kakus ngambika mai mayuh agi pemansang enggau mega nyadi teladan ti patut dititih NGO ke bukai,” iya nambah.
Sikie ngarap Perantau ulih majak gawa sereta bekerejasama enggau ajensi ke bekaul mutarka isu ti tau meri empas positif ngagai pengidup komuniti dia.
“Aku ngarapka pengawa Perantau ulih dikerembai sereta berat agi ke pemansang modal mensia kelebih agi pemansang pelajar enggau penanggul rama bala nembiak kitai ba Tatau,” ku Sikie.
Iya meri pengaga ati ngagai Perantau ketegal mayuh macham penagawa ti dipejalai kenyau ari taun 2015 ti u dah meri mayuh asil ke manah laban pengelurus sida gawa ke nadai ti nadai ngaul diri enggau politik sereta agenda diri empu.
Komiti baru Perantau iya nya Mohammad Rizal Julaihi nyadi chairman, Ningkan Unsu (sapit chairman), Lee Mui Ling (sapit chairman 1), Esther Ansai (sapit chairman 2), Jacqueline Mato (sekretari), Kurniawan Abd Haris (sapit sekretari) and Lee Moi Hoi (tukang wang).