Dikarang Rengenyan Labang
KUCHING: Pengawa nyadong dadah di Sarawak ngayanka trend ti berupai niki.
Ketuai Opis Mansik Penyalah Narkotik (JSJN) Sarawak Superintenden Sahar Abdul Latif madahka, nya berindik ari penyakah strategi, operasi enggau pansik ti dipejalaika piak polis sereta sukung ari ejensi ti bekaul sereta raban bansa.
Ku Sahar, ba pengawa mutarka kes dadah ba nengeri tu piak iya lebih mekuh ngagai penyadong kelimpah ari penguna dadah.
"Bepelasarka statistik tiga bulan keterubah taun 2019, kitai mujur nangkap 275 iku penyadong. Penyampau tu nyau deka setengah ari penyadung dua taun sebedau tu.
"Dipelabaka nyentuk bulan Disember taun tu, kitai arap tauka ulih enggau lebih mayuh tauka chakah agi mutar tauka muntanka (penyadong) dikena ngurangka pangka dadah di Sarawak.
"Chara kitai betapi sereta mutarka kes dadah di Sarawak iya nya keterubah ninggangka ukum ngagai penyadong; kedua, ninggangka ukun ngagai penguna enggau ketiga reta penyadong," ku iya, sehari tu.
Sahar mansutka pekara nya dalam licha aum pengarang berita bekaul enggau chara mutarka penanggul dadah, 'Macau Scam' enggau 'Love Scam' ti diatur bilik opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah ba Bangunan Baitulmakmur ditu.
Bejaku baru Sahar madahka penyampau rega reta penyadong ke ulih ditangkap mega sepenyampau urung RM1 juta dalam timpuh tiga bulan keterubah 2019.
Lalu dalam bulan Mei taun tu, bepelasarka proses ti dipejalaika dipelabaka penyampau rega reta penyadong ke ulih ditangkap engka ulih urung RM3 juta, ku iya.
Kelimpah ari nya lebuh ke ngenang penguna dadah di Sarawak, iya madahka serata Sarawak dalam timpuh tiga bulan keterubah taun 2019 ngerikutka 658 penguna ditangkap.
Lalu bekaul enggau nembiak sekula ti nyadi penguna dadah, Sahar madahka, nya nyadi kes bukai laban nembiak dianggap seiti indikator ti enda manah ba raban bansa, ti udah kelalu tumu betapi penanggul dadah.
"Naka ke diatu diriputka ngagai Narkotik ari Februari ngagai Mac (2019) bisi 118 iku nembiak positif (dadah) ai kemi.
"Nya alai nama ke dikereja kitai diatu ngiga sapa penyadong. Kitai enda diau diri ba pekara tu laban Narkotik nganggap nembiak nya anak," ku iya.