Anda di sini

Pelajar reta ti pemadu beguna, ngangkatka tikas pengidup

 Jugah maya bejaku ba mua mensia mayuh.
PESAN AKU: Jugah maya bejaku ba mua mensia mayuh.

SIBU: Kaban Parlimen (MP) Lubok Antu Jugah Muyang ngelalau bala apai indai ngambi ngemeratka pelajar anak laban nya nyadika reta ke pemadu beguna ngagai anak sida jemah ila.

Ku iya, semina pemujur ba pelajar aja ulih ngubah tikas pengidup ruang bilik lebih agi ba menua pesisir.

“Kitai anang enda meras nyengulaka anak nyentuk ke sida mujur.

“Semina sekula aja endur begigaka penemu dikena nentuka pengidup rebak baru meruan agi dudi hari ila,” pia ku iya madah maya Pengerami Merarau Pemesai Begulai enggau PIBG SK Menjuau, di Lubok Antu, empai lama tadi.

Berebak enggau nya mega, Jugah madahka diri randaka kerejasama ari Gerempung Apai Indai enggau Pengajar (PIBG) ngaduka pemansang pelajar ba Parlimen Lubok Antu.

“Aku beguna amat kerejasama ari mensia mayuh bela besaup ngemansangka tikas pelajar lalu pia mega ba pekara pemansang di sekula.

“Sekula ti likun sereta lantang alai belajar deka matak pengerindu nembiak belajar ti ngujungka sida deka bulih pemujur ba sekula,” ku iya madah baru.

Ba pengerami nya, Jugah besemaya ngungkupka RM230,000 ngagai SK Nanga Menjuau.

Bantu nya siti ari pengeransing iya ngemansangka agi perengka guna di sekula nya kelimpah ransing deka meda pengajar enggau nembiak sekula lantang ngajar sereta belajar.

Kelimpah ari sekula nya, nyauka semua sekula sekondri enggau primari di Parlimen Lubok Antu udah dilawa iya sereta nyaup meri ungkup ngagai sekula.

Tu mandangka iya ti endang peranak asal Lubok Antu bebendar deka meda nembiak dia mujur magang ba sekula.

Pengerami sehari nya dirichah agi enggau penatai lebih kurang 200 iku mensia mayuh ari rumah panjai ke besemak sereta digulu bala tuai raban bansa dia.

Ba pengerami nya, Jugah bela nyuaka pemeri sepenyampau RM90,000 ngagai tujuh buah rumah panjai.