Anda di sini

Kus Pansik Orang Indu Dayak TSEJ di UPM meri pemaik ngagai SIDS

 Minor (tujuh kanan), Annie (lapan kanan) enggau raban bukai maya nyambut penatai Alice (enam kanan) di Kapit, empai lama tadi.
TERIMA KASIH DATAI: Minor (tujuh kanan), Annie (lapan kanan) enggau raban bukai maya nyambut penatai Alice (enam kanan) di Kapit, empai lama tadi.

SIBU: Penumbuh ‘Kursus Penyelidikan Wanita Dayak Tan Sri Empiang Jabu (TSEJ)’ tauka Kus Pansik Orang Indu Dayak TSEJ deka mai mayuh pemaik ngagai bala raban enggau anak Sarakup Indu Dayak Sarawak (SIDS) nyengkaum raban bansa Dayak nengeri tu.

Presiden SIDS Dato Ir Alice Jawan madah, TSEJ tu bela nyendiaka bantu pelajar ngagai nembiak ti deka nampung pelajar ngagai tikas ke tinggi agi.

“TSEJ deka meri bantu pelajar ngagai beberapa iku ke dipilih nyadi ‘Sholar SIDS’ ba degree, master enggau doktor falsafah (PhD) di Universiti Putra Malaysia (UPM).

“Semua tu endang dikena kitai ngemansangka raban indu kitai enggau bala anak sida ba pemujur pelajar,” pia ku iya maya Program Randau begulai enggau komiti eksekutif SIDS Pampang Kapit maya ke nemuai kia di Kapit, empai lama tadi.

Sama bela datai maya tu iya nya Chairperson SIDS Pampang Kapit Annie Blikau enggau Penyanding Penemu SIDS Pampang Kapit Minor Panyau.

Alice ti mega Sekretari Mendam Opis Menteri Utiliti ngansak indu Dayak lebih agi raban SIDS ngambika semampai nyukung penumbuh Kursi TSEJ tu.

“Tu siti ari awak manah dikena kitai bansa ngelawa pemansang ba pekara pelajar.

“Kitai ngarap mayuh agi raban kitai deka bulih pemaik ari bantu pelajar nya,” ku iya madah baru.

Iya mega madah, perintah nengeri bela tekait ati sereta besetujuka pengawa numbuh Kursi TSEJ tu.

Ku iya, perintah nengeri ti betuaika Kepala Menteri Datuk Patinggi Abang Johari Tun Openg setuju bendar enggau penumbuh Kursi TSEJ nya.

“Abang Johari setuju amat enggau Kursi TSEJ tu alai kitai udah betemu enggau iya bulan September taun siti tadi nerang ngagai iya pekara tu,” ku iya madah.

Ba pekara bukai, Alice mega bekunsika chara enggau langgur penemu ba pengawa mai pampang SIDS chakah agi bejalaika pengawa ti deka mai pengelantang ngagai bala raban.

Iya ngansaka bala indu ba SIDS ngambika majak besaup ngelawa tuju pemansang indu Dayak ke bela nentuka pemujur ngagai nengeri tu.

Berebak enggau pengawa sehari nya, Annie enggau Minor bela madahka diri berasai temegah ati nyambut Alice ti datai ari jauh ketegal deka berandau enggau raban SIDS Pampang Kapit.

Seduai madah, raban SIDS Pampang Kapit beruntung bendar laban bulih penemu, lalau enggau penerang bekaul enggau pemansang SIDS ti bepelasarka pelin perintah maya hari tu.

“Alice siku indu ti chakah, profesional enggau lalau ari iya beguna amay ngagai kitai besaup ngemansang sereta ngempung kaul indu Dayak di negeri tu,” pia ku seduai madah.