MARUDI: Kaban Parlimen (MP) Baram Anyi Ngau madahka pengerami Agro Fest Baram ti keterubah dipejalai di Marudi tauka di Baram nya semua dikena ngiri penemu bakani chara ti engkeman ngereja pengawa betanam betupi.
“Saritu kitai udah meda mayuh ejensi perintah ti mandangka kereja enggau tanggungpengawa opis sida sida lalu nya ngujungka 32 buah seruyuk ti dibuka ungkup mensia mayuh kelebih agi ngagai bala orang bumai.
“Pengawa bekebun ke paling mayuh sekali di Baram iya nya MPOB lalu tu seriris enggau perintah GPS ti sama dibantu Opis Betanam Betupi dalam belajarka bakani gaya bala sida ti bekebun tauka bumai,” ku iya madah.
Berindik ari nya, Sapit Kepala Menteri ke mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas udah bebendar sentang program tu lalu sekali agi iya (Uggah) udah dipilih nyadi Chairman HDA di Baram.
Anyii Ngau madahka nya ngagai pengarang berita sepengudah pengawa iya ngelepaska 52,000 iku anak ikan ngagai Batang Sungai Baram ti nyadi kelai bejadi Pengerami Ngemunka Fiesta Agro Fest Baram ke diatur ba Dataran Marudi ditu lalu bedau lama.
Kelimpah ari nya, ku iya nambah, mayuh seruyuk ari mayuh macham ejensi lalu ti mih peluang ngagai komuniti belajar.
“Taja kitai ngembuan mayuh tanah tang nyema enda nemu ngerejaka nya, tu pan enda deka meri penguntung.
“Ngagai sida ti seruran deka mansang nyadi orang dagang, kita patut ngerejaka tanah nya ngambi bisi meri asil ti manah,” ku iya.
Sama bisi datai ba pengerami nya Sapit Speaker DUN Dato Gerawat Gala, Pemangku D.O SAO Vanessa Joseph, Pemesai Opis Betanam Betupi Bagi Menua Miri Jackson Nanta Barnabas, Penghulu Randi Bundan, Penghulu Anthony Kule Lalo , Penghulu Endrews Gaphar sereta Sima Lait (Pemesai Opis Betanam Betupi Marudi).