Anda di sini

Tiga buah KK di Tabuan Jaya, Siburan, Serian berengkah digaga taun tu

Advertisement
 Dr Lee (dua kanan) sereta ke bukai lebuh bejalai ba palan pemandang nyerumba ‘Minggu Kesedaran Garam Sedunia 2019’, kemari.
NGABAS: Dr Lee (dua kanan) sereta ke bukai lebuh bejalai ba palan pemandang nyerumba ‘Minggu Kesedaran Garam Sedunia 2019’, kemari.

KOTA SAMARAHAN: Tiga buah Klinik Pengerai (KK) iya nya di Tabuan Jaya, Siburan enggau Serian dipelabaka berengkah digaga taun tu.

Sapit Menteri Pengerai Dr Lee Boon Chye madahka, ketetiga klinik nya udah diperambu sebedau tu sereta udah nengah proses tinda projek.

“Tinda projek udah dipejalaika taun tu mega enggau aku dipadahka iya nya dua ari projek udah ditutup tinda lalu seiti projek udah diberi kontrak ngagai kontraktor.

“Nya alai kitai ngasaika pengawa ngaga nya mega patut iya dipelabaka deka berengak taun tu,” ku iya ba aum pengarang berita pengudah bejadika ‘Minggu Kesedaran Garam Sedunia 2019’ di Summer Mall ti bisi digulu Direktor Unit Nagang Penyakit Dr Nurhayati Rusli enggau Kaban Parlimen (MP) Bandar Kuching Dr Kelvin Yii.

Dr. Lee madahka, Klinik Pengerai (KK) di Tabuan Jaya tu ‘Jenis 2’ iya nya lebih besai lalu KK Serian enggau Siburan sama digaga ‘Jenis 3’.

Ungkus ngaga KK Serian iya nya RM30 juta, lalu KK Siburan enggau KK Tabuan Jaya sama beungkus RM40 juta.

Bekaul enggau pengawa ngaga dua buah sepital besai iya nya Sepital Petra Jaya enggau Sepital Sri Aman, iya madahka, Petra Jaya diatu dalam proses tinda baru ngagai kontraktor baru.

“Kontrak enggau kontraktir lama udah kitai diketuka laban sida enda nembuka projek taja pan udah diberi timpuh ti lebih.

“Projek tu diatu dalam proses tinda baru sereta kontraktor baru nya ila patut ngambi projek.

“Naka ke diatu semina 70 peratus udah digaga sereta kontraktor baru enggai nyadi enda berengkah sekali agi,” ku iya seraya madahka ngaga baru projek enda ulih dipejalaika ba taun tu.

Sepital Petra Jaya ti berega RM495 juta berengkah digaga ba bulan Mei 2013 sereta patut tembu kena 29 November 2016.

Ngenang pasal Sepital Sri Aman. Dr Lee madahka nya mega bisi lubah mimit sereta ngarapka ulih ditembuka ambis kurang taun baru.

Sepital Sri Aman nya berega RM200 juta enggau udah dikemendarka pengawa ngaga nya 12 taun ke udah.

Advertisement