Anda di sini

Perintah nengeri deka ngemetulka Konsitusyen Perintah Besai

Advertisement
Fadillah
Fadillah

KUCHING: Perintah nengeri ti diiring tauka diketuai Gabungan Parti Sarawak (GPS) deka betemu begulai semua ‘pemegang taruh’ nyengkaum penyanding penemu undang-undang berengkah minggu baru dikena ngemetulka pengelemi ti bisi ba Konsitusyen Perintah Besai.

Pekara tu dipadahka Ketuai Whip Parlimen GPS Dato Sri Fadillah Yusof dalam seiti penerang ditu ensanus bekaul enggau ubah Rang Undang-undang (RUU) Perkara 1(2) Konsitusyen Perintah Besai ti enda dikemendar ba Dewan Rakyat 9 April tu tadi.

“Enti kitai deka ngemetulka pekara tu, biar mih kitai ngereja pekara ti betul ari pun sereta ngelamun semua pengelemi ke bisi dalam Konsitusyen Perintah Besai sebedau kitai ngemendarka RUU tu ba bulan Julai ila.

“Pengawa deka ngubah RUU tu ti enda diterima minggu nyin kemari pengujung dalam pengawa tu lalu aku pechaya pemanah ati perintah besai mantaika baru RUU tu ngena ubah ti dikedeka kitai,” ku iya.

Fadillah ti mega Kaban Parlimen Petra Jaya madahka, Sarawak enda minta lebih ari nama ke bisi dalam Sempekat Malaysia 1963 (MA63) tang deka ngenegutka enggau mutarka sebarang pengelemi dikena ngelindung hak Sarawak.

Ku iya, Konsitusyen Perintah Besai udah dilangkar lebih ari setengah abad ke udah.

“Pekara udah berubah kenyau ari nya lalu kita enda ulih ngarapka nya nyadi dokumen ti menyana nadai seberang pengelemi.

“Ari peneleba pengelama betaun-taun, kami udah nemu pengelemi baka ke bisi dalam Perkara 16A1A(7) iya nya lis bansa ti asal ari Sarawak nadai ngerintai (menyenaraikan) bansa Iban, Bidayuh sereta tauka Lun Bawang.

Lalu, ku iya, ‘Hari Malaysia’ mega lenyau maya numbuhka Konsitusyen Perintah Besai.

“Tu meh kebuah kitai amat silik dalam ngubah RUU tu laban ngira semua pekara enggau pengelemi bukai.

“Kami enda ngundi RUU tu, kami enda nulak RUU tu, kami ‘berkecuali’ laban maya kitai deka ke RUU tu dikemendqr tang kita ngasaika iya patut dikemanahka agi.

“Kitai udah lama nganti RUU tu kenyau ari suba, udah tentu kitai ulih nunggu tiga bulan agi nyentuk Aum Parlimen ke deka datai enggau meresa baru RUU tu sebedau iya dibantaika baru,” ku Fadillah.

Ku iya  madahka, endang amat Kepala Menteri datuk Patinggi Abang Johari Tun Openg udah setuju secara prinsip tang iya semina secara prinsip laban enda disempulang silik langkar RUU ke deka diubah.

Iya madahka, leka jaku asal MA63 enggau langkar RUU ulih dikemanahka enggau ditegutka agi.

Berebak enggau tu Fadillah madahka, mayuh orang berasi teperasa tauka kechewa (kecewa) bekaul enggau ubah RUU Perkara1(2) Konsitusyen Perintah Besai ti enda diluluskan maya dibantaika ba Parlimen Hari Dua apin lam.

Ku iya, sekeda piak berengkah nunjukka jari sereta ngiga penyalah ketegal enda puas.

Taja pia , ku iya nerangka, lebuh bekaul enggau pengawa mai pulai baru hak Sarawak enggau Sabah nyengkaum ngelindung kepentingan Sarawak, patut nadai kompromi pasal pekara tu.

Iya mega nganggap Menteri ba Opis Menteri Besai Datuk Liew Vui Keong, Menteri Kerja Raya Baru Bian enggau Sapit Menteri Dagang Dalam NEngeri enggau pekara Penguna Chong Chieng Jen ukai munsuh.

“Nadai orang bukai ti lebih ransing dibandingka enggau kitai GPS lalu kitai amat sedar tauka nemu iya nya deka betapi enggau jaku anu politik ari raban sida ti enda mereti pasal isu tauka enda meretika peengawa kitai dalam mai pulai hak Sarawak.

“Lalu, nadai sapa ke ulih ngenggaika iya nya kitai GPS lebih sayauka Sarawak, nya kebuah kitai bediri tegap taja pan kitai nemu deka bisi timbal politik,” ku iya.

Berindik ari pekara nya, ku Fadillah, nya kebuah piak iya nyeretaka sama jadual dalam penerang tu ti nerangka bekaul RUU ti deka diubah ngambika rayat meretika pekara nya.

Advertisement