KOTA SAMARAHAN: Empat ari lima peranak Malaysia ngambi garam ti lebih ari pematut ti dipadahka Pertubuhan Kesihatan Sedunia (WHO).
Sapit Menteri Pengerai Dr Lee Boon Chye madahka, WHO udah netapka tikas pematut penyampau garam kurang ari ‘satu paras’ sudu teh garam sehari tauka 5 gram garam sehari.
“Tang nitihka pansik pemadu baru iya nya ‘Kajian Pengambilan Garam Populasi Malaysia’ iya nya raban bansa di menua tu ditemu ngambi pukul rata garam sehari iya nya sepenyampau 7.9 garam sama enggau 1.6 sudu teh garam.
“Pansik mega tetemuka empat ari lima peranak Malaysia ngambi garam lebih ari pematut,” ku iya lebuh bejaku maya bejadika ‘Minggu Kesedaran Garam Sedunia 2019’ di Summer Mall ditu, kemari.
Bejaku baru Dr. Lee madahka sida ti ngambi garam ti lebih deka bulih risiko penyakit darah tinggi tauka hipertensyen enggau nyema enda ditagang ulih meri risiko nyadi strok enggau penyakit jantung.
Ku iya, pansik tetemuka rayat Malaysia rindu makai pemakai ti ditambah enggau mayuh bansa sos, ‘penambah asai pemakai’ nyengkaum garam ti endang masin.
Dr Lee madahka bisi 10 bansa pemakai ti suah diempa sereta ngujungka penyampau tikas ngambi garam ti tinggi.
Entara nya, sayur ti diguring, roti burak, telu dadar, manuk guring berempah, asi guring, asi lemak, ‘roti canai’ tauka ‘roti telur’, bihun guring, mi guring enggau kari manuk.
Kelimpah ari nya ku iya, bisi mega pemakai ti mai ngagai tikas ngambi garam ke mayuh dalam sekali ngidangka pemakai baka ‘mi kolok’ tauka ‘mi kampua’, mi kari, sayur guring sos tiram, ‘mi segera goreng’, mi sup, sayur guring ikan masin enggau asi guring.
Kelimpah ari nya Sapit Ketuai Direktor Pengerai (Pengerai Mensia Mayuh) Dr. Chong Chee Kheong lebuh ke bejaku madahka, Malaysia bisi tagit dikena ngurangka ‘pengambilan garam populasi’ di Malaysia sepenyampau 30 peratus lebuh manggai taun 2025.
Ku iya nya senipak enggau juluk ti ditetapka ba tikas global ari WHO kenyau ari taun 2013.
“Dikena nyapai juluk tu, Malaysia patut ngurangka tikas ngambi garam ari 8.7 gram sehari ngagai 6.0 gram sehari lebuh manggai taun 2025,” ku iya nengah teks iya ti dibacha Direktor Bahagian Kawalan Penyakit, Dr Nurhayati Rusli.