KUCHING: Pengawa ngatur nengeri tu patut dipejalai peranak Sarawak empu.
Kepala Menteri, Datuk Patinggi Abang Johari Tun Openg madahka, laban pemansang Sarawak meseti senipak enggau jalai pengidup asal ti bisi ba nengeri tu.
Nambahka nya iya madahka dikena ngemaju tauka ngemansangka nengeri tu mega begunaka penyerakup sereta sukung rayat.
“Sarawak semina ulih diatur sereta dikemansangka ulih anak Sarawak empu, laban kitai ti nemu jalai pengidup kitai orang Sarawak.
“Lalu dalam pekara ngatur administrasyen pemansang, kitai aja ke nemu laban kitai Sarawak ke nemu jalai pengidup kitai.
“Baka enti aku nemu (jalai pengidup) kitai empu, aku ulih ngatur (administrasyen pemansang) enggau manah, enti dipegai orang tentu enda ulih.
“Kitai deka ngelatih pemesai tauka ketuai biak ngambika ulih nampung kitai jemah ila, baka pengudah Tun Pehin Sri Taib lalu ditampung Pehin Sri Adenan Satem, udah nya ditampung aku lalu udah aku ditampung orang ke biak, laban kitai enda tau enda cheremat sereta ngelanggur enggau manah ari sukut administrasyen,” ku iya.
Abang Johari mansutka pekara nya lebuh bejadika Karnival Darul Hana 2019 ti diatur Lembaga Pembangunan dan Lindungan Tanah (PELITA), Gerempung Ukai Dikuasa Perintah (NGO) Kampung Seberang Hilir enggau Komiti Masjid Darul Haba ba kandang endur Masjid Darul Hana ditu, sehari tu.
Berebak enggau tu iya mega madah dalam pengawa ngemajuka nengeri tu, Sarawak patut cheremat sereta beratika timbal ari rayat kelimpah ari ngena chara baru.
“Kitai Sarawak pintar, nya kebuah kitai cheremat.
“Bepelasarka peneleba kitai, enti deka negi tauka ngetanka (nengeri)kitai patut cheremat anang kelalu begaut enti begaut salah singkang lalu enti salah singkang, tusah kitai jemah ila, anak uchu kitai merinsa.
“Perintah Gabungan Parti Sarawak (GPS) deka terus bejalaika tanggungpengawa ngemansangka Sarawak, dalam kitai merambu pemansang nengeri kitai patut bejimat sereta ngena timbal tauka input enggau ngena chara baru dikena kitai sama ngemansangka sereta Sarawak dalam perintah besai Malaysia,” ku iya seraya madahka enggau chara tu gaya nengeri jemah ila deka manah.
Lebuh ti ngenang pasal Kampung Darul Hana, iya madahka Daruh Hana nyadi model ba endur ngemansangka genturung pendiau baru awakka ulih meri pengelantang pendiau ngagai ruang bilik ti betambah.
Projek Darul Hana mungkur 12 genturung pendiau tauka Kampung ari Kampung Boyan ngagai Kampung Bintawa Hilir dikemansang sereta nyadi model ngagai projek transformasyen genturung pendiau bukai di Sarawak.
Abang Johari madahka projek bukai ti sebaka enggau Daruh Hana ba genturung pendiau di serata nengeri lebih agi ba mengeri besai baka Sibu, Bintulu enggau Miri deka ngemeranka model projek Darul Hana.
“Ba Darul Hana ditu kitai bisi nyendiaka Taman Islam ti beungkus urung RM8 juta.
“Laban kitai deka ngetanka seni, adat enggau main asal genturung ba genturung pendiau tauka Kampung tu, kitai numbuhka Muzium Warisan Darul Hana ti ngena belanja urung RM3 juta.
“Darul Hana deka disikap ngena kereban pemadu baru dalam digital laban kitai deka ke Darul Hana nyadi Smart City,” ku iya seraya madahka nya perambu timpuh panjai Darul Hana sereta dikereja enggau bererenggat.
Sama bisi ba pengerami nya kemari Speaker Kunsil Nengeri Datuk Amar Mohamad Asfia Awang Nassar, Menteri Muda Lektrik Menua Pesisir Datuk Dr Abdul Rahman Junaidi ti mega Kaban Kunsil Nengeri (ADUN) Pantai Damai; Menteri Muda ba Opis Kepala Menteri (Undang-Undang) ti mega ADUN Samariang, Sharifah Hasidah Sayeed Aman Ghazali enggau ke bukai.