KOTA SAMARAHAN: Raban Kristian Anglikan di Samarahan deka bisi gerija baru ti manah sereta besai endur besembiang ba ujung bulan Mei tu.
Nitihku Rev. Canon Dennis Gimang ti betanggunjawab, Gereja Anglikan St Francis ti beungkus RM5 juta deka tembu ba bulan Mei sereta diberkatka ujung bulan September taun tu.
Iya madahka gereja dua tingkat nya deka ulih nampung lebih ari 1,000 iku orang besembiang dalam siti timpuh sereta bisi kereban ti ngemeratka orang tuai.
“Gereja tu diatu 90 peratus udah tembu. Nya deka udah tembu enti nadai diubah.
“Ngarika gereja enggau raban Kristian Anglikan ditu, aku meri terima kasih tauka puji ngagai Perintah Sarawak nengah Unifor (Unit Hal Ehwal Agama-Agama lain) ke udah meri RM1 juta ke nyadi ungkus belanja dikena ngaga gereja tu,” ku iya.
Rev. Canon Dennis madahka pekara nya lebuh nerima penemuai Sapit Kepala Menteri Datuk Amar Douglas Uggah Embas ke datai meresa tauka matau pejalai projek nya, kemari.
Ngarika gereja, ku iya sida beretima kasih ngagai Uggah ke nyadi Chairman UNIFOR laban ti udah mantu gereja bulih pemeri nya.
Uggah disempulang Direktor Unifor Datu Dr. Ngenang Janggu enggau Sekretri Politik ngagai Kepala Menteri Dr. Richard Rapu ti meri awak diri urung sejam ngabas pejalai projek nya.