KUCHING: Runding tauka peragam ti ngumbai orang ke bisi penanggul pengerai mental nya ‘gila’, patut dibuai tauka diubah.
Kaban Parlimen Bandar Kuching, Dr. Kelvin Yii madahka laban reti pengerai runding nya bekaul enggau pengelantang psikologi enggau emosyen orang sesiku.
“Leka jaku ‘mental’ engka ngenangika mayuh orang, sereta nganggap nya orang gila sereta ulih ngeruga. Penemu tauka anggap ti baka nya patut diubah.
“Kebendar, pengerai mental tu pasal untak,runding enggau emosyen sesiku,” ku iya lebuh bejaku seraya bejadi Karnival Pengerai Mental ba Vivacity Megamall Kuching ditu, kemari.
Bejaku baru iya madahka penanggul pengerai mental nyadi ketegal peminta tauka gaya pendiau pengidup kemaya hari tu majak nambah sereta gaya pengidup ti seruran deka ngiga lebih.
“Kebuah penanggul pengerai mental nyadi laban kurang pelajar tauka penemu pasal pengerai mental, mayuh stigma sereta saru penemu pasal pengerai runding.
“Nambahka nya kurang profesional, standard pengerai mental ti kurang enggau chara berubat ti enda tetap kelimpah ari ti nadai nerima jaku sukung ari orang ke ngelinggi.
“Anang enda ingat, munuh diri ukai chara dikena mutarka penanggul pengerai runding tekala nya tang begunaka timpuh ti panjai enggau pengeran diri (deka gerai ba mental),” ku iya.
Berebak enggau tu iya madahka penanggul pengerai mental ulih digeraika enti kitai ulih milih chara pengidup ti meruan.
Orang ke ngelinggi mega bejalaika tanggungpengawa mantu orang ti bisi penanggul pengerai runding baka berundingka baka ni kitai ulih mereti sereta beratka orang bukai, meri pengibuh ngagai orang ti betapi pemar sereta nentuka sida nya enda kediri, enda takut enggau enda malu ketegal penanggul ke ditapi, ku iya.
“Pengidup chukup berega. Pengerai mental ti manah ukai bepun ari sepital tauka bilik berubat.
“Tang nya berengkah ari endur gawa, sekula enggau raban bansa. Nengah penemu ti betul sereta tetiap iku kitai bulih penemu ke betul,” ku iya.
Kelimpah ari nya Dr Kelvin mega madahka Sarawak ngerikod statistik ti keempat tinggi bekaul enggau isu tauka penanggul pengerai runding.
Nitihku iya, ke tampak agi ketegal tusah ati ti 35 peratus ba orang biak ke beumur 16 taun ke atas enggau 16 peratus baruh 16 taun.
“Tang kemaya hari tu majak mayuh raban biak ti betapi enggau gaya pengidup ti mar enggau berat. Pengidup seilu-ilu, enda ulih tinduk ketegal bisi pengirau sereta ngerunding deka munuh diri udah majak nambah ari taun 2015 ngagai 2017 di Sarawak,” ku iya.
Lebuh ke ngenang pasal Karnival Pengerai Mental ti diatur 12 ngagai 14 April, Dr kelvin karnival nya senipak bendar dikena meri penyedar ngagai mensia mayuh.
“Tuju karnival tu dikena nambahka penemu (pasal pengerai mental),” ku iya.
Karnival nya diatur Persatuan Sedia Bersahabat Kuching begulai enggau gerempung ukai dikuasa perintah nyengkaum, Gerempung Pengerai Mental Sarawak, Story Kuching, Sepital Sentosa, Fakulti Pemansang Mensia enggau Sains Kognitif ari Universiti Malaysia Sarawak sereta TST Cognitive Development Centre.
Sama bisi datai ba pengerami nya kemari Direktor Hospital Sentosa Dr. Rosliwati Md Yusoff enggau ke bukai.