KUCHING: Sarawak nengeri keterubah bejalaika inisiatif ngatur Kus Pemesai Integriti Bertauliah (CeIO) dikena matih bala pemesai ari mayuh bengkah opis menteri, opis, opis residen enggau pelilih menua, Op is Bekaul enggau Perintah sereta Kompeni Bekaul enggau Perintah (GLC) nengeri.
Kepala Menteri, Datuk Patinggi Abang Johari Tun Openg madahka kus tauka latih nya diatur senipak bendar enggau juluk Opis Nagang Makai Suap Malaysia (SPRM) ti deka bejalaika akta sida ba taun 2009.
Iya madahka deka mai Sarawak nyadi nengeri maju lebuh manggai ba taun 2030, endang begunaka semengat integriti sereta sukung ari rayat.
“Baka ti dipadahka ngagai aku, Seksyen 17A Akta SPRM 2009 deka berengkah dipejalaika kena 1 Jun 2020. Lalu semua ejensi patut naka ulih diberi setipikit sebedau haribulan (Akta) nya berengkah dipejalaika.
“Kitai di Nengeri Sarawak, opis (perintah nengeri) udah bejalaika pengawa nitihka garis lalau numbuhka unit tu (integriti) ti ditentu bepelasarka tikas risiko makai suap ejensi.
“Aku dipadahka, enti matau ejensi bisi risiko tinggi sida deka ke 15 iku pemesai, enti ejensi bisi jelan iya risiko (22 iku pemesai) sereta enti enti ejensi nya baruh risiko sida deka ke tujuh iku aja,” ku iya.
Abang Johari bejaku munyi nya lebuh ba pengerami nutup Program Certified Integrity Officer (CeIO) Siri 22 Bil.2/2019 ke diatur ba Dewan Santapan Begunan Kunsil Nengeri Lama ditu, lemai kemari.
“Kitai Nengeri Sarawak, laban tu baru berengkah lalu orang Sarawak ti beintegriti tinggi, kitai dipinta ngambika sebuah ejensi bisi siku ngagai tiga iku pemesai,” ku iya.
Program CeIO nya diatur begulai entara Unit Integriti enggau Ombudsman Opis Kepala Menteri (UNION), Opis Nagang Makai Suap Malaysia (SPRM) enggau Akademi Nagang Makai Suap Malaysia (MACA), ti dipasuk 44 iku pesereta.
Dulu ari nya, Direktor MACA, Idris Zaharudin madahka program nya diatur senipak enggau Surat Tesau Opis Perintah bil 6/13, enggau tuju numbuhka Unit Integriti nyadi ‘focal point’ ngagai chara ngaduka isu integriti ba semua ejensi opis perintah.
Iya madahka Program meri tanda basa ngagai CeIO mega senipak enggau pengeran perintah dalam konteks pelin transformasyen runding ti senipak enggau betul dikena nempa raban bansa ke ngembuan moral enggau etika tinggi sereta beintegriti.
Tanggungpengawa CeIO ku iya, ngelanggur sereta bejalaika program bekaul enggau integriti dalam organisasyen. Kelimpah ari nya, CeIO mega ketuai ti diperati sereta dichunto, pemudah sistem ngenatai ngagai mensia mayuh ti nyadi ejen mai ubah ngagai chara kereja ti nulak makai suap.
“Aku ngarika SPRM meri puji ngagai SUK Sarawak laban mai pekara baru iya nya kerejasama dalam pengawa ngatur program sereta nyadika Sarawal nengeri keterubah dalam menua mai program tu ngagai pemesai ba ejensi di baruh Opis Perintah Nengeri.
“Aku arap bendar inisiatif baka tu deka meri empas besai ba pengawa meri servis ejensi perintah nengeri sereta ngangkatka imej enggau pemai perintah nadai makai suap sereta mansang agi enggau dikearapka orang luar.
“Aku arap bendar nengeri tu deka nyadi chunto ngagai nengeri bukai ngambika sama meri asil positif ngagai penyulut ‘Corruption Perception Index’ (CPI) ti betuaika ‘Transparency International’ sereta nyadi ikas penanda pemeranak puku ari menua luar,” ku iya dalam jaku pengelalu iya.
Sama bisi datai ba pengerami nya kemari, Menteri ba Opis Kepala Menteri (Integriti enggau Ombudsman) Datuk Talib Zulpilip, Sekretari Perintah Nengeri Tan Sri Datuk Amar Mohamad Morshidi Abdul Ghani, Menteri Muda ba Opis Kepala Menteri (Pekara Korporat) Abdullah Saidol enggau ke bukai.