Anda di sini

Universiti enggau IPT tebuka ungkup semua komuniti

 Mazula (dua kiba) disempulang Sulong (dua kanan) enggau Kadim (kiba)bejadi progam ‘Jom Masuk IPT 2019’ di Mydin Petra Jaya.
UNGKUP KOMUNITI: Mazula (dua kiba) disempulang Sulong (dua kanan) enggau Kadim (kiba)bejadi progam ‘Jom Masuk IPT 2019’ di Mydin Petra Jaya.

KUCHING: Universiti enggau palan pelajar tinggi (IPT) enda patut dipeda nyadi sebuah palan pelajar ti semina eksklusif ungkup raban ti bepenemu aja, tang mega meseti tebuka ngagai semua komuniti.

Direktor Unit Ngatur Peminta Nembiak (BPKP) Opis Pelajar Malaysia (KPM) Mazula Sabudin madah, universiti nyadi inkubator ti ulih mantu menua dalam ngadaka orang ti pintar sereta komuniti ti bepenemu seriris enggau polisi pelajar iya nya ‘universiti ungkup semua’.

Pia mega ku iya, universiti mega nyadi palan endur bemacham penemu ke deka ngadaka raban ketuai menua, ulih mutarka penanggul rama sereta ke berat iya nya nempa komuniti Malaysia ti bepenemu sereta tuai runding.

“Ba jeman Malaysia baru tu, kitai dekaka runding orng ngagai univerisiti berubah ngambika nya nyadi palan intelektual ti tebuka.

“Semua penemu, teori, buah runding, chara berunding patut dibai enggau naka pemanah ti ulih,” ku iya bejaku ba pengerami ‘Jom Masuk IPT 2019 Zon Sarawak’ di Mydin Petra Jaya ditu bedau lama.

Beserimbai enggau nya, Mazula madah, pengawa ngatur karnival ‘Jom Masuk IPT’ nya ulih narit mensia mayuh dalam pengawa perintah ngerembaika penerang bekaul peluang masuk ke IPT ngagai komuniti.

“Baka ti ditemu kitai, pelajar nyadi hak siku mensia lalu nya nyadi tanggugnpengawa perintah nengah opis menteri sereta ejensi ti bekaul dalam pengawa nyediaka nya enggau naka pemanah.

“Ungkup tuju nya, tagit kitai iya nya dekaka nembiak sereta nyediaka palan ti mayuh ngagai sida ke baru udah tembu sekula ti bekualiti enggau nitihka kriteria ti dirintai,” ku iya nerang.

Tang, taja pia ku iya nyemetak, ba pekara nya KPM muka jalai khas ngagai empat bansa iya nya orang nyelai pendiau, atlit, orang asal sereta sida ti bepenatai pemisi B40.

Sama bisi datai Pengerusi Lembaga Pengarah Universiti Malaysia Sarawak (Unimas) Tan Sri Panglima Sulong  Matjeraie, Naib Canselor Unimas Prof Dr Mohamad Kadim Suaidi sereta temuai dipebasa ke bukai.