SIBU: Skim Gempuru Sekuau, siti genturung pendiau ke ditumbuh dalam bungkur Rajang Area Security Command (RASCOM) maya jeman siga suba patut digaga kelai ngambika sejarah dia semampai dikeingat.
Kaban Kunsil Nengeri (ADUN) Tamin Ir Christopher Gira Sambang madah, genturung menua nya tau digagaka siti muzium tauka rumah panjai lama dia digaga nyadi ‘homestay’.
“Leftenan General Datuk Stephen Mundaw bisi madah skim tu patut digaga kelai dikena ngingatka sejarah penumbuh RASCOM.
“Ba aku penemu ngaga muzium tauka ‘homestay’ engkeman bendar dikena ngemujurka juluk ati manah tu.
“Enti tu mujur ila mensia mayuh ke bukai tau datai nemuai kia,” pia ku iya madah maya dipebasa bejadi bup ‘The Murder Of Penghulu Imban’ ba sebuah restoren ditu, malam ensana.
Sama bela datai maya tu iya nya Stephen Mundaw enggau pengarang bup, Leftenan Kolonel (B) Linus Lunsong Janti sereta bala bukai.
Dikena ngemujurka penemu nya, ku Gira, peranak di Sekuau bela tau mantaika langgur penemu sida ngagai perintah nengeri Sarawak.
“Pia mega kitai pechaya Mundaw nyukung ngemujurka penemu tu nambahka iya endang orang gawa pasal soldadu kelimpah taja udah pinchin tang iya udah dichiri nyadi pemesai khas ngagai Kepala Menteri.
“Tu nyadi siti pengelebih penemu tu deka dipenyadi nangkan tu ila,” ku iya madah baru.
Bekaul enggau bup ‘The Murder Of Penghulu Imban’, Gira madah, keterubah iya bup nya dipenyadi di Kuching sebedau tu.
“Bup tu dikena kitai ngingatka sapa niang Penghulu Imban. Nama utai ke udah dikereja iya, nama kebuah iya dibunuh komunis suba.
“Ngelama tu semina sida sebilik enggau suku juru niang empu nemu nama cherita ke benar nyadi.
“Nya alai bup tu dikarang ngambika semua kitai nemu cherita niang Penghulu Imban lebih agi rebak baru diatu,” pia ku iya sambil beterima kasih ngagai Linus ti udah nyanggup peminta iya ngarang bup nya.
Kelimpah ari bup nya, iya mega minta sapa ke bisi pengelandik bela tau ngarang bup nusi cherita bujang berani kelia baka cherita enggi niang Bechai ari menua Ulu Oya.
“Ukai semina nya, kita mega tau ngarang bup nusi cherita Mundaw empu ti nyadi bansa Dayak keterubah megai pangku pengawa ke besai dalam soldadu.
“Laban ke nyadi pengari rayat aku endang beamat-amat nyukung pengawa ngarang bup tu baikka ari sukung penemu tauka ba pekara belanja,” ku iya madah.