Anda di sini

Sebuah organisasyen patut sedia nerima penemu ti manah

 Tuai Rumah Lani (dua kanan) nyuaka tanda pengingat ngagai Mong (lima kiri) seraya diperatika bala bukai.
KE PENGINGAT: Tuai Rumah Lani (dua kanan) nyuaka tanda pengingat ngagai Mong (lima kiri) seraya diperatika bala bukai.

SRI AMAN: Ulah ti ulih bekerejasama, berunding panjai sereta deka mansang iya nya nyadi pekara ti berat dikena ngenegapka agi sebuah organisasyen, pia ku Kaban Kunsil Nengeri (ADUN) Bukit Begunan Datuk Mong Dagang.

Nitih ku iya, nyema sebuah organisasyen nya enda ngembuan pekara ti berat nya, nya mega deka ngayanka sebuah organisasyen ti nadai kerejasama enggau pangan diri, berunding jauh sereta enda mansang ke mua.

“Berindik ari nya, aku deka meri jaku tangkan ngagai sekeda organisasyen ti bisi di nengeri tu ngambika ulih nyeliah ulah bansa nya lelau nyema kitai deka mansang ke mua, sebuah organisasyen nya patut ngembuan ulah ti ulih bekerejasama sereta mega nemu berunding panjai,” ku iya.

Iya madah munyi nya lebuh ti bejaku ba Pengerami Randau ti bepalan ba Rumah Lani, Entulang Jalai, Sri aman ditu bedau lama ti udah.

Ku iya, ulah bekerejasama, ulih berunding panjai sereta deka mansang nya ukai nyadika kelai ti ngengkahka sebuah organisasyen nya ba penuduk ke tinggi dalam organisasyen ke bukai tang organisasyen nya patut seruran ulih nerima jaku padah sereta nerima penemu orang bukai enggau ati ti lantang.

“Reti nya, sida ke nyadi kaban ngagai sebuah organisasyen nya patut nerima tetiap jaku padah tauka jaku tangkan enggau ati ti lantang, laban berindik ari semua jaku tangkan nya ulih ngangkatka pemansang organisasyen kitai.

“Bisi dalam sekeda raban komuniti ti enda ulih nerima jaku padah tauaka penemu orang bukai lalu berindik ari ti enda ulih nerima jaku padah enggau penemu nya terus ngujungka sida pambar dalam sebuah organisasyen nya,” ku iya nerang.

Ku Mong nambah, pemambar sebuah organisasyen nya suah dipeda kitai kelebih agi dalam kaban Komiti Pemansang enggau Pengelikun Genturung Pendiau (JKKK) di rumah panjai lalu pekara bansa nya enda patut nyadi dalam organisasyen kitai kelebih agi organisasyen JKKK.

“Nyema bisi penemu ti enda sebaka enggau pangan diri, nya ti ngasuh bisi runding deka numbuhka rumah panjai baru tauka numbuhka JKKK baru ketegal ti udah bisi besengki penemu enggau pangan diri tauka mayuh agi.

“Pekara bansa nya enda patut nyadi dalam organisasyen kitai, tang kitai semua patut duduk begulai sereta berandau enggau pangan diri mutarka sebarang penanggul ti nyadi ti ditapi semua lalu nguji enggau naka ulih mutarka nengah chara ti manah,” ku iya nyemetak.

Ku Mong nerang, nyema pekara bansa nya terus nyadi dalam organisasyen kitai, udah tentu sebuah organisasyen nya enda ulih tan lama lalu nya mega enda uilih mansang ke mua baa organisasyen ke bukai.

Beserimbai enggau nya, pekara ti pemadu berat ke patut bisi dalam sebuah organisasyen iya nya ulah ti ulih bekerejasama, bebasaka pangan diri sereta ulih nerima jaku padah enggau ati ti lantang ke nyadi pekara ti ulih mai ngagai pemansang enggau penegap sebuah organisasyen nya,” ku iya nambah.

Sama bisi datai ba pengerami nya Kunsilor Menjang Niah, Kunsilor Atal sereta ke bukai.