Anda di sini

Sarawak ngembuan kandang menua kampung ti besai

 Awang Tengah macha teks ngemunka Pengerami Hari Kampung Antarabansa Renggat Nengeri Sarawak 2019.
BEJADI: Awang Tengah macha teks ngemunka Pengerami Hari Kampung Antarabansa Renggat Nengeri Sarawak 2019.

BINTULU: Sarawak ngembuan kandang kampung ti besai ke ulih nyukung industri kayu tang kurang ari sukut ngemansutka asil produk ari industri nya, kelebih agi dalam pengawa ngaga kereban ti bepelasarka kayu taja makit dalam industri nya besai.

Sapit Kepala Menteri Datuk Amar Awang Tengah Ali Hassan madahka enggau kreativiti ti dikembuan nya, patut udah ngaul diri enggau industri ti berega nya nengah pengawa begulai dikena ngubah industri kayu ke uih ngasilka produk ke berega ungkup nengeri tu.

Ku iya, enggau pengelandik ti bisi ba tikas universiti ulih dikena ngaga pengawa pemansik ke atas spesies kayu ti jampat tumbuh lalu ukai semina mekuh ngagai spesies akasia aja tang mega spesies bukai.

“Kitai meransang pengawa pemansik digaga lalu sepengudah bekerejasama enggau institusyen antarabansa baka Jepun enggau sekeda menua bukai sereta muka taman negara ungkup ngaga pansik,” ku iya bejaku bejadi Penegerami Nyambut Hari Kampung Antarabansa Renggat Nengeri Sarawak 2019 ba Dewan Sri Kenyalang Universiti Putra Malaysia Kampus Bintulu (UPMKB) bedau lama.

Menteri Pemansang Mengeri enggau Pengeraja Asal II nya madah, nengeri tu patut ngetanka enggau nyaga pesaka kampung enggau naka ulih lalu dalam ngatur pemansang fizikal, perintah Sarawak seruran nyemelaka pemansang enggau guna dalam ngintu rampa menua.

Ku iya madah, perintah nengeri bejalaika polisi ngintu kampung ngambika enda dikeruga enggau penusah ngenyit baka ti nyadi ba mayuh menua bukai.

Nitih ku iya, di Sarawak, perintah agi ulih ngetan sereta nyaga kandang kampung ti mungkur 63 peratus ti nyediaka 50 peratus ngagai kandang kampung Malaysia.

“Nya ngayanka kitai (Sarawak) ngembuan polisi ti nyadi dalam industri kayu batang, ngintu kampung enggau meruan agi lama sereta pengawa ngemaru nya deka dipejalai ninting maya,” ku iya nerang.

Kelimpah ari nya, iya nambah, nyadi pengawa ti dikena nentuka bekal ai dijaga, perintah nengeri mega udah nambah pemesai kandang menua Herat of Borneo (HoB) ari 2.1 juta hektar ngagai 2.7 juta hektar ti endang nyadi kandang menua bekal ai ti pemadu besai ukai semina ungkup ai irup sereta guna domestik tang mega ulih nyadi dikena ngemansang tekat ti ulih mekalka kuasa entara nya BAkun, Murum, Batang Ai enggau Baleh.

Iya ke mega Menteri Pemansang Industri enggau Dagang madahka geaya nya ulih ngelengkaska proses pemansang industri ti nyukung projek industri di Koridor Kuasa Ulih Dikemaru Sarawak (SCORE).

Di Samalaju BIntulu, ku iya, udah ngerikod (FDI) RM30 bilion ari pemeranak puku dalam enggau menua luar ti udah beoperasyen enggau bisi mayuh agi pemeranak puku deka masuk ke nengeri tu laban kitai nyediaka taris elekterik kompetitif ketegal ti bisi kuasa hidro ke ulih mekalka guna ngagai industri.