Anda di sini

Perintah Sarawak enda ngambi hak rayat ba pengawa nyukat tanah NCR

 Harden nyain plak kelai bejadika jalai genturung pendiau nuju ke Rumah Juan, Genting San.
PENYAMBUNG: Harden nyain plak kelai bejadika jalai genturung pendiau nuju ke Rumah Juan, Genting San.
 Harden disempulang peranak genturung pendiau ngetas tali gelembung kelai bejadika pengawa ngaga jematan nuju ke Rh Juan, Genting San.
BEJADI: Harden disempulang peranak genturung pendiau ngetas tali gelembung kelai bejadika pengawa ngaga jematan nuju ke Rh Juan, Genting San.

SRI AMAN: Perintah Sarawak nadai niat ngambi tanah hak rayat nengah pengawa nyukat tanah Hak Adat Bumiputera (NCR).

Menteri Muda Pengelantang Pendiau Raban Bansa, Datuk Francis Harden Hollis madahka, pengawa nyukat tanah nya ke dipejalaika perintah nya meri penguntung ngagai rayat tauka peranak genturung pendiau.

Perintah nengeri bejalaika pengawa nyukat tanah NCR dibaruh Program Nyukat Tanah NCR Inisiatif Baharu, iya nya nengah Kanun Tanah Negeri (KTN) dibaruh Seksyen 6 pengawa nyukat garis entara genturung pendiau, lalu di dibaruh Seksyen 18 KTN pengawa nyukat individu dipejalaika sereta surat pala tanah diberi ngagai pengempu tanah enti udah tembu disukat.

“Ulah sekeda orang ti nuchuk enggau nyaruka runding rayat ngambika enda meri keresajama ngagai pangan diri, nya endang ulah ti nagang pemansang raban bansa ti bisi tanah NCR.

“Perintah Sarawak nadai niat ngambi tanah hak rayat.

“Beberapa taun ke udah rayat ngansak perintah bejalaika inisiatif ngaga penerang ngagai raban bansa pasal penguntung ari pengawa nyukat tanah, lalu berindik ari nya perintah ngemendarka ungkup belanja ti besai sepenyampau RM80 juta.

“Tang lebuh atur pengawa nyukat dipejalaika, dia rayat dimanipulasikan sekeda orang ngambika nagang tanah ari disukat,” ku iya.

Harden ti mega Kaban Kunsil Nengeri (ADUN) Simanggang ngenang pekara nya lebuh bejaku nyerumba Pengerami Bejadika Infrastruktur Rumah Juan, Genting San ditu, apin lama.

Iya madahka perintah enda ibuhka ulah sekeda piak tang terus nyendiaka ungkup belanja dikena bejalaika pengawa nyukat tanah NCR rayat di nengeri tu.

“Laban berundingka pemesai guna nyukat tanah ti meri penguntung ngagai rayat, perintah Sarawak nengah Gabungan Parti Sarawak (GPS) udah besetuju nambahka ungkup belanja RM40 juta dikena neruska pengawa nyukat tanah.

Kelimpah ari nya, lebuh ti ngenang pemansang infrastruktur Rumah Juan, Genting San, Harden arapka bendar pemansang pengawa betanam betupi ulih dipejalaika laban udah bisi jematan ti nyambungka seberai Sungai Undop.

Dikena ngemansangka rayat ari segi sosio-ekonomi ba raban bansa genturung pendiau, Harden ngungkupka agih belanja ari RTP enggau MARES sepenyampau RM3.2 juta dikena ngemansangka ti nyengkaum ngaga jematan besi meraka Sungai Undop; Jalan desa 2.4 KM, bekal elektrik, bekal ai beresi sereta projek ngemanahka kaki lima (veranda) enggau atap rumah panjai.

Sama bisi datai ba pengerami nya, Pegawai Pelilih menua Sri Aman Mohd Ashree Wee, Jurutera Bahagian JKR Sri Aman Bujang Kanang sereta bala tuai rumah enggau ke bukai.