Anda di sini

Pengereja pengawa meseti kreatif, bisi inovasyen sereta ngembuan integriti

Advertisement
 Uggah nyuaka Diploma ngagai siku graduet ti mujur nembuka pelajar iya ba PMBS.
TEMEGAH ATI: Uggah nyuaka Diploma ngagai siku graduet ti mujur nembuka pelajar iya ba PMBS.

BETONG: Pengereja pengawa ti kreatif, bisi inovasyen enggau integriti endang diguna lalu diperebut dalam ngangkatka produktiviti sereta kualiti idup menua.

Sapit Kepala Menteri Datuk Amar Doughlas Uggah Embas madahka perintah nengeri komited deka nyediaka peluang pelajar tinggi ngagai semua rayat, nya alai penumbuh Politeknik Metro Betong Sarawak (PMBS) nyadi siti singkang positif ti mandangka pemerat rayat.

“PMBS nyadi chunto ti pemadu manah ke enda ngira alai geografi sebuah palan pelajar tinggi.

“Sapa ti nyangka kandang menua pesisir baka Betong nya ngembuan palan pelajar tinggi ti ditukuka sama enggau palan pelajar tinggi ke bukai di mengeri,” ku iya.

Iya madah munyi nya lebuh ti bejaku maya bejadi Pengerami Konvokesyen kali ke-3 Politeknik Metro Betong sarawak (PMBS ti diatur ba Dewan Gemilang Maktab Rendah Sains Mara (MRSM) Betong ditu kemari.

Ku iya nambah, tikas besemekih menua nyadi pemerat ke patut nyadi penguji tetiap graduet ti deka ditempa.

“Nya alai, kitai ngarapka pelajar sereta meretika penemu patut seruran diangkat lalu ditegapka taja pelajar ti formal bala graduet udah abis di PMBS.

“Pengerami tu nyadi pun pejalai ungkup sida ti udah graduet dalam ngatur singkang ke tikas ti tinggi sentang belajar reti enggau chara pengidup bekereja,” ku iya.

“Penemu sereta budaya penemu iya nya siti proses ke dinamik ti terus lalu nya nyadi siti komponen ke berat dalam proses pemansang pamanh ulah diri, organisasyen sereta menua.

“Kitai diatu betapi enggau peminta era profesionalisme ba dalam program akademik ti meseti ngira pematut industri, graduet PMBS nadai pilih tang meseti terus bebendar nyikap diri enggau pengelandik ti dipinta raban industri dikena ngangkatka tikas besemekih sida ba makit kereja global.

“Kita mega bisi dipadahka, tikas pengulih dalam makit ba taun 2018 ungkup gradeut PMBS iya nya 97.27 peratus. Iya nya siti pekara ke ngemegahka ati.

“Nya alai, endang dikearap ngambika graduet ti ditempa deka terus ngambi peluang dalam nambahka pengelandik ba bidang sida ti bekaul jam ti deka datai,” ku iya.

PMBS udah ngadaka 130 graduet ti mujur nembuka pelajar sida ke dirami sereta nerima diploma sida empu.

Sama bisi datai ba pengerami nya Kaban Kunsil Nengeri (ADUN) Layar Gerald Rentap Jabu, Direktor Unit Kompetensyen Ngangkatka Pengawa Mohammad Isa Azhari, Direktor PMBS Suhaili Aleh, Residen Bai Menua Betong Friday Belik, Ketuai Bidang Akademik PMBS Jamilah Hussain, Ketuai Bidang Sukung Akademik PMBS Shukri Mohammad Ros sereta ketuai bidang ke bukai enggau mensia mayuh.

Advertisement