Anda di sini

Bala tuai rumah Ulu Mukah, Ulu Dijih, Ulu Selangau dipinta nentuka pemeresi rampa menua

 Ngumbang (duduk, empat kiba) begulai enggau raban gerempung sepengudah betuaika aum Gerempung Tuai Rumah Menua Ulu Mukah, Ulu Dijih enggau Ulu Selangau, empai lama tadi.
BEGEMPUNG: Ngumbang (duduk, empat kiba) begulai enggau raban gerempung sepengudah betuaika aum Gerempung Tuai Rumah Menua Ulu Mukah, Ulu Dijih enggau Ulu Selangau, empai lama tadi.

SIBU: Bala tuai rumah ba rumah panjai menua Ulu Mukah, Ulu Dijih enggau Ulu Selangau ngambika besaup nyaga pemeresi kandang rampa menua sida enggau manah.

Chairman Gerempung Tuai Rumah Menua Ulu Mukah, Ulu Dijih enggau Ulu Selangau, Ngumbang Awit madah, rampa menua tu nyengkaum sungai ba menua sida.

“Kitai meseti ngeripot orang ti ngaga pengawa enda menuku baka ngerachun ikan.

“Ulah ngerachun tu tau bendar ngujungka ikan ba sungai kitai punas,” pia ku iya maya betuaika aum gerempung nya di Balai Mensia Mayuh Kampung Danau, Selangau ditu, empai lama.

Iya mantaika pekara nya ketegal ngira pemaik ngagai semua kelimpah endang udah nyadi tanggungpengawa tuai rumah nyadi ketuai nyaga sereta ngintu rampa menua sereta pengelikun rayat sida.

Nambahka jaku iya, Ngumbang mega nagang peranak rumah panjai enda ngasu ngagai menua bukai nangika sida dipadahka tama kebun orang enda beradat sereta bebai senapang.

“Ngerachun ikan endang sida penyalah lalu pia mega pengawa ngasu ba tanah orang nadai pemendar.

“Nya alai, aku ngarapka bala tuai rumah semampai ngajar nembiak sida ngambika enda ngereja dua iti ulah tu.

“Tu sebagi ari tanggungpengawa kitai ke nyadi Tuai Rumah, nyeliahka pekara enda disadang nyadi,” ku iya madah baru.

Ba pekara bukai, Ngumbang madahka tuai rumah ke bisi peti surat Pos Komuniti di Selangau nurun ke Pasar Selangau ngambi surat ti ngena address rumah panjai sida abis nadai tiga kali seminggu.

“Kebuah pia laban mayuh tuai rumah ari Ulu Dijih, Tamin, Ulu Mukah, Sekuau, Ulu Arip enggau Ulu Selangau enda ngambi surat sida.

“Nya alai sida ke empai ngambi kunchi peti surat sida tau betelefon ngagai aku nengah 019-8587325 tauka betemu enggau aku empu di Pasar Selangau,” pia ku iya.

Gerempung tu bisi 60 iku raban lalu penumbuh iya dikemendarka Opis Pelilih Menua Selangau urung tiga taun ke udah.