Anda di sini

MARA Sarawak deka mayuh agi pedagang nembiak bidang automotif, ngaga begunan

 Awangku Hafizi (kiba) nyuaka tepa pengingat ngagai Mohd Razib sereya diperatika Lilian (kanan).
MERI BASA: Awangku Hafizi (kiba) nyuaka tepa pengingat ngagai Mohd Razib sereya diperatika Lilian (kanan).

SIBU: Majlis Amanah Rakyat (MARA) Nengeri Sarawak dekaka ngadaka mayuh agi raban pedagang nembiak dalam bidang automotif sereta ngaga begunan nengah Program Latih Nempa Orang Dagang (LPU) AutoCon MARA 2019.

Pemesai MARA Pelilih Sibu Mohd Razib Mohad Tahir madahka LPU udah diatur MARA kenyau ari 30 taun ti udah lalu nya ti keterubah program ke mekuh ngagai bidang automotif enggau ngaga begunan.

“LPU nya siti kus ke suah ditemu sama enggau MARA kenyau 30 taun ke udah lalu diatur ninting taun di tetiap nengeri, kelebih agi ungkup orang dagang nembiak ke beumur baruh 40 taun,” ku iya madah ngagai pengarang berita.

Mohd Razib ditemu ba Pengerami Nutup enggau Makai Lemai Program LPU AutoCOn MARA 2019 di sebuah hotel ditu, malam kilah ensana. Bisi 30 iku pesereta ari Sibu, Mukah, Kapit enggau Sarikei udah nitihka program ti dipejalai berengkah 10 nyentukka 20 Mac 2019 di YMCA Rave Camp.

Program nya dikena ngadaka mayuh agi orang dagang nembiak ti ngaul diri dalam bidang automotif enggau ngaga begunan, ke mega lalu ulih ngadaka mayuh agi orang dagang ti ngaul diri dalam bidang teknikal di Sarawak.

“Nengah program LPU nya, dikearap mayuh agi orang dagang teknikal deka diadaka di SArawak kelebih agi ari raban nembiak.

“Kitai mega ngarapka ila sida ulih nyingkang ngagai tikas ke tinggi agi enggau ngaul diri dalam bidang industri,” ku iya nerang.

Sepengudah kus nya, pesereta ulih minta duit jali nyentukka RM50,000 ngagai MARA nibuh bisi guarantor kelimpah geran bukai ti sama mega bisi disediaka MARA.

Bekaul pesereta kus ti deka tauka udah nyadi orang dagang, Mohd Razib madah sida deka bejalaika tanggungpengawa ti manah ke nyediaka peluang gawa ngagai orang bukai.

“Kita patut andal lebuh ti nyadi orang dagang lalu meri kereja ngagai orang bukai. Nengah gaji ti diberi kita, sida mega ulih nganjung anak ke sekula lalu ulih ngubah pengidup sida sebilik,” ku iya madah.

Program LPU nya diatur MARA Nengeri Sarawak enggau kerejasama PSU Management. Sama bisi datai ba pengerami nya KOnsultan Kanan PSU Management Harizan Ashaari, Ketuai Pemesai EKsekutif (CEO) kus Awangku Hafizi Awang Azahari sereta Menijer Besai kus Lilian Linus.